تمام تر توجہ علم کے فروغ اور سیرت و کردار کی پاکیزگی پر مرکوز رکھیں، 25 ہزار فعال مراکزِ علم کا قیام ہمارا ہدف ہے: شیخ الاسلام کا منہاج القرآن انٹرنیشنل کی مجلسِ شوریٰ کے اجلاس سے خطاب

شیخ الاسلام ڈاکٹر محمد طاہرالقادری دامت برکاتہم العالیہ نے تحریکِ منہاج القرآن کی تنظیمات، جملہ فورمز اور شعبہ جات کی دس سالہ کارکردگی پر اطمینان کا اظہار کرتے ہوئےکہا کہ الحمدللہ تمام گرم سرد حالات کے باوجود تحریک کا دعوتی کام بلاتعطل جاری رہا، جس سے نہ صرف لاکھوں لوگوں نے علمی استفادہ کیا بلکہ ملئینز کی تعداد میں لوگوں تک مشن کا پیغام پہنچا۔ شیخ الاسلام دامت برکاتہم العالیہ نے سانحہ ماڈل ٹاؤن کے حوالے سے گفتگو کرتے ہوئے کہا کہ حصول انصاف کی جنگ آج بھی جاری ہے، 6 سو سے زائد پیشیاں بھگت چکے ہیں، شہداء کے ورثاء کی سرپرستی بھی جاری ہے، انہوں نے مشن سے وفا کی ہے انہیں کبھی تنہا نہیں چھوڑیں گے۔

انہوں نے اراکینِ شوریٰ کو تلقین کی کہ وہ اپنی تمام تر توجہ علم کے فروغ اور سیرت و کردار کی پاکیزگی پر مرکوز رکھیں، ہر گھر کو مرکز علم بنائیں، 25 ہزار فعال مراکزِ علم کے قیام کا ہدف مقرر کر رہا ہوں، لہٰذا ہر رفیق اپنے سکول، ادارے، تجارتی مرکز یا گھر میں مرکزِ علم قائم کرے۔

شیخ الاسلام دامت برکاتہم العالیہ نے اعلان کیا کہ آج سے ہر رفیق کے لیے ایک نصاب زندگی دے رہا ہوں جسے زندگی کے آخری سانس تک پڑھا جائے جن میں عرفان القرآن، The Manifest Quran، الروض الباسم مِن خُلق النبی الخاتم ﷺ، منہاج الصالحین، منہاج العقائد، منہاج الاحکام، سیرت النبوی ﷺ اور تدریس و تقریر شامل ہیں۔ چیئرمین سپریم کونسل پروفیسر ڈاکٹر حسن محی الدین قادری نے شوریٰ کے اجلاس کے دوسرے سیشن سے خطاب کرتے ہوئے کہا کہ ہم صرف اس وقت اپنی دعوت و پیغام کو عامۃ الناس تک مؤثر انداز میں پہنچا سکتے ہیں جب خود باعمل اور باکردار داعی بنیں۔ انہوں نے کہا کہ دعوتِ دین کے لیے حکمت اور لہجے کی نرمی بنیادی شرط ہے۔ بعض مواقع پر خاموشی اختیار کرنا بھی حکمت کا تقاضا ہوتا ہے، جیسے اللہ تعالیٰ نے دو نمازوں کو سری اور تین کو جہری رکھا ہے۔

پروفیسر ڈاکٹر حسن محی الدین قادری نے کہا کہ ضروری نہیں ہے کہ سوشل میڈیا پر چلنے والی بحثوں میں حصہ لیا جائے کبھی کبھی خاموشی بھی مؤثر جواب ہوتا ہے۔ انہوں نے ذمہ داران و کارکنان پر زور دیا کہ منہاج القرآن کے آفیشل سوشل میڈیا پورٹل منہاج365 موبائل ایپ کے باقاعدہ استعمال کو یقینی بنائیں اور اس میں وضع کردہ مراکزِ علم کے نظام سے بھرپور فائدہ اٹھائیں۔ صدر منہاج القرآن انٹرنیشنل پروفیسر ڈاکٹر حسین محی الدین قادری نے اپنی گفتگو میں منہاج القرآن انٹرنیشنل اور منہاج یونیورسٹی کی حالیہ کامیابیوں پر بریفنگ دی۔ انہوں نے کہا کہ منہاج القرآن انٹرنیشنل کی اعتدال و توازن پر مبنی فکر کو عالمی سطح پر قبولِ عام حاصل ہو رہا ہے، جو تحریک کے فکری و علمی استحکام کا ثبوت ہے۔ اس سے قبل ناظمِ اعلیٰ خرم نواز گنڈاپور، مرکزی نائب ناظمِ اعلیٰ تنظیمات انجینئر رفیق نجم اور ڈائریکٹر سوشل میڈیا عبدالستار منہاجین نے اراکینِ شوریٰ کو تنظیمی کارکردگی اور سوشل میڈیا حکمتِ عملی پر مفصل بریفنگ دی۔

اجلاس میں نائب ناظمین اعلیٰ، سربراہان مرکزی شعبہ جات، فورمز سربراہان سمیت دنیا بھر سے منہاج القرآن انٹرنیشنل کی مرکزی مجلس شوریٰ (فیڈرل کونسل) کے ممبران فزیکل اور آن لائن شریک ہوئے۔