چیئرمین سپریم کونسل منہاج القرآن انٹرنیشنل پروفیسر ڈاکٹر حسن محی الدین قادری کا جامع شیخ الاسلام میں جمعۃ المبارک کے اجتماع سے خصوصی خطاب
انسان کی اصل پہچان اس کی شانِ نظم اور شانِ ترتیب ہے: پروفیسر ڈاکٹر حسن محی الدین قادری
لاہور: پروفیسر ڈاکٹر حسن محی الدین قادری چیئرمین سپریم کونسل منہاج القرآن انٹرنیشنل نے جامع شیخ الاسلام میں جمعۃ المبارک کے اجتماع سے خصوصی خطاب کرتے ہوئے کہا کہ اللہ تعالیٰ کی تخلیق کردہ ہر چیز میں نظم اور ربط ہے۔ اللہ تعالیٰ نے انسان کو اشرف المخلوقات بنایا اور یہ فضیلت اسے نظم و ضبط اور شعور کی بدولت عطا کی گئی ہے، انسان انس اور نسیان کا مجموعہ ہے، یعنی وہ محبت کے جذبات بھی رکھتا ہے اور اس میں بھولنے کی صفت بھی موجود ہے۔ اللہ تعالیٰ انسان سے یہ چاہتا ہے کہ وہ ہر اس چیز سے محبت کرے جو میری ہے اور ہر اس چیز کو بھول جائے جو میری نہیں ہے۔
انہوں نے کہا کہ انسان کی اصل پہچان اس کی شانِ نظم اور شانِ ترتیب ہے۔ ایک مؤمن باقاعدہ نظم و ضبط کا پابند ہوتا ہے اور اس کی زندگی کے شب و روز بے ترتیبی کا شکار نہیں ہوتے۔ اللہ کی کوئی تخلیق نظم کے بغیر نہیں ہے، اس لیے اشرف المخلوقات یعنی انسان بھی نظم و ضبط کے بغیر اپنی حقیقی شان برقرار نہیں رکھ سکتا، روزہ انسان کو نظم و ضبط والی زندگی اختیار کرنے کی تربیت دیتا ہے۔ اللہ کی ہر تخلیق اپنے افعال میں نظم رکھتی ہے اور یہی نظم انسان کو بھی اپنی زندگی میں اختیار کرنا چاہیے۔
انہوں نے مزید کہا کہ زبان اور شرم گاہ کی حفاظت کرنے والوں کے لیے جنت کی بشارت ہے۔ جو شخص اپنی نفسانی خواہشات پر قابو پا لیتا ہے وہ قرآن مجید کے بیان کردہ انسانیت کے بلند ترین مقام پر فائز ہو جاتا ہے، انسان کا زبان اور الفاظ کے استعمال میں محتاط ہونا بھی نظم و ضبط کا حصہ ہے، انسانی زندگی کے یہ تمام افعال نظم و ضبط اور ربط سے تعلق رکھتے ہیں۔ جب انسان اپنی زندگی سے نظم اور ربط کھو دیتا ہے تو وہ نہ صرف اپنے لیے بلکہ دوسروں کے لیے بھی نقصان دہ ثابت ہوتا ہے، اگر کسی کے پاس اچھا بولنے کا اختیار نہیں ہے تو خاموش رہنا بہتر ہے کیونکہ اللہ تعالیٰ کو مومن کی خاموشی بھی پسند ہے۔ حضور نبی اکرم ﷺ نے فرمایا کہ خاموشی بھی عبادت ہے۔
نمازِ جمعہ کے اجتماع میں صدر منہاج القرآن انٹرنیشنل پروفیسر ڈاکٹر حسین محی الدین قادری، ناظمِ اعلیٰ منہاج القرآں انٹرنیشنل خرم نواز گنڈاپور، راجہ زاہد محمود اور مرکزی قائدین سمیت اہلِ علاقہ کی کثیر تعداد شریک تھی۔ بعد ازں پروفیسر ڈاکٹر حسین محی الدین قادری نے ملک و قوم اور ملتِ اسلامیہ کی سلامتی و استحکام کے لئے خصوصی دعا فرمائی۔ نمازِ جمعہ کی ادائیگی کے بعد چیئرمین سپریم کونسل منہاج القرآن انٹرنیشنل پروفیسر ڈاکٹر حسن محی الدین قادری نے مرکزی قائدین، گوشہ نشینیان اور اندرون و بیرونِ ملک سے تشریف لائے ذمہ داران و کارکنان سے ملاقات بھی کی۔
تبصرہ