تحریک منہاج القرآن فیصل آباد
فیصل آباد میں تحریک منہاج القرآن کا آغاز 1984ء میں ہوا، جبکہ پہلا دفتر 1987ء میں کارخانہ بازار میں حاجی شیخ محمد رشید قادری کی سربراہی میں قائم ہوا۔ فیصل آباد میں تحریک منہاج القرآن کے تحت اس وقت متعدد ادارے، سکول اور سیل پوائنٹس چل رہے ہیں ۔ تحریک منہاج القرآن فیصل آباد کا ڈویژنل سیکرٹریٹ سرکلر روڈ پر بیرون کچہری بازار موجود رضوان بادشاہ بلڈنگ میں واقع ہے۔
فیصل آباد کا شیخ الاسلام ڈاکٹر محمد طاہرالقادری سے بڑا گہرا رشتہ ہے۔ آپ نے گورنمنٹ کالج فیصل آباد میں سال 1966ء میں داخلہ لیا اور سال 1968ء میں ایف ایس سی کا امتحان پاس کیا۔ ان دو سالوں میں روزانہ جھنگ سے فیصل آباد آتے جاتے رہے، یوں فیصل آباد کو آپ سے ایک خاص نسبت ہے۔
ضلع فیصل آباد کی تمام تحصیلوں میں تحریک منہاج القرآن کی تنظیمات قائم ہیں اور ضلعی سطح پرتحریک منہاج القرآن کے تمام فورمز منہاج القرآن ویمن لیگ، منہاج یوتھ لیگ، مصطفوی سٹوڈنٹس موومنٹ اور منہاج ویلفیئر فاؤنڈیشن سرگرم عمل ہیں۔ فیصل آباد میں پاکستان عوامی تحریک بھی فعال کردار ادا کر رہی ہے۔
منہاج ویلفیئر فاؤنڈیشن فیصل آباد کے زیراہتمام ہر سال غریب اور نادار بچیوں کی شادی کی اجتماعی تقریب منعقد کی جاتی ہے، جس میں درجنوں بچیوں کے ہاتھ پیلے کئے جاتے ہیں۔ دسمبر 2014ء میں ہونے والی تقریب میں بیک وقت 40 بچیوں کی شادیاں ہوئیں۔
منہاج ایجوکیشن سوسائٹی کے زیراہتمام فیصل آباد میں 14 سکول چل رہے ہیں، جو گلفشاں کالونی، غوثیہ ٹاؤن، گنگاپور، ماموں کانجن، سمندری، باہمنی والا، رحمت آباد، چک نمبر 40 ہلواڑہ بغدادی ٹاؤن، چک نمبر 53اور چک نمبر 98 میں واقع ہیں۔
منہاج القرآن ویمن لیگ فیصل آباد کے زیراہتمام غلام محمد آباد میں منہاج القرآن گرلز اکیڈمی کے نام سے ایک تعلیمی و تربیتی ادارہ قائم ہے، جہاں بچیوں کو اسلامی کی بنیادی تعلیمات سے روشناس کروانے کے ساتھ ساتھ اسلامی اقدار کے مطابق زندگی بسر کرنے کی تربیت کی جاتی ہے۔
منہاج یوتھ لیگ فیصل آباد نوجوانوں کو قیام پاکستان کے مقاصد کے شعور دلانے کیلئے مؤثر کردار ادا کر رہی ہے۔ اسی طرح مصطفوی سٹوڈنٹس موومنٹ فیصل آباد میں واقع کالجوں اور یونیورسٹیوں میں زیرتعلیم طلبہ و طالبات کو اسلامی تعلیمات سے روشناس کرانے اور پاکستان میں تعلیمی انقلاب بپا کرنے کیلئے جدوجہد کر رہی ہے۔
پاکستان عوامی تحریک فیصل آباد عوام الناس میں بیداری شعور کیلئے مصروف عمل ہے۔ شہریوں میں اپنے حقوق کا شعور بیدار کرنا ہو یا وطن عزیز پاکستان کی سالمیت کیلئے قربانی دینے کی بات ہو پاکستان عوامی تحریک فیصل آباد ہر معاملے میں پیش پیش ہے۔
تبصرہ