عالمی میلاد کانفرنس 2024

منہاج القرآن انٹرنیشنل کی عالمی میلاد کانفرنس 2024 مینارِ پاکستان، لاہور کے سرسبز میدان میں منعقد ہوئی۔ شیخ الاسلام ڈاکٹر محمد طاہرالقادری اپنے روح پرور خطاب میں ’’سیرت نبوی ﷺ اور حلم‘‘ کے موضوع پر روشنی ڈالی۔ اس عظیم الشان اجتماع میں دنیا بھر سے ممتاز سکالرز اور مشائخ عظام سٹیج کی زینت بنے۔

حضور نبی اکرم ﷺ سے محبت ہر مومن کا سرمایۂ ایمان ہے، اور تحریکِ منہاجُ القرآن پچھلی چار دہائیوں سے عشقِ مصطفی ﷺ کی شمع کو فروزاں کرنے میں مصروفِ عمل ہے۔ مینارِ پاکستان کا گراؤنڈ ہر سال لاکھوں عاشقانِ رسول ﷺ کو اپنے دامن میں سمیٹ کر اس بات کا گواہ بنتا ہے کہ یہاں حضور ﷺ کی ولادت کا جشن منا کر امتِ مسلمہ کے لاکھوں مسلمان اپنے ایمان کو تازگی بخشتے ہیں، اور پورا سال ان کے دل محبت مصطفی ﷺ کی تپش سے دھڑکتے رہتے ہیں۔

پاکستان بھر سے جید علماء و مشائخ عظام، مذہبی و سیاسی جماعتوں کے قائدین، سماجی رہنما، تاجر برادری، وکلا، اور طلبہ تنظیموں کے سربراہان عالمی میلاد کانفرنس کے سٹیج پر موجود ہیں۔ پنڈال کے اندر اور ملحقہ سڑکوں پر نصب دیو قامت جدید ڈیجیٹل اسکرینوں کے ذریعے سٹیج کی کارروائی کو براہِ راست دکھایا جا رہا ہے۔

حضور اکرم ﷺ کے غلاموں کے لیے اس سے بڑی کوئی مسرت نہیں کہ وہ آپ ﷺ کی ولادتِ باسعادت کا جشن منائیں۔ اس سے بڑا خوشی کا کوئی سماں نہیں کہ لاکھوں عاشقانِ مصطفی ﷺ آج 12 ربیع الاول کی مبارک صبح کا انتظار کر رہے ہیں، وہ ساعتِ سعید جس میں حضور اکرم ﷺ دنیا میں تشریف لائے۔

یہ لائیو ویڈیو ایمان اور محبت کا ایک خوبصورت اظہار ہے، جو دکھاتی ہے کہ کس طرح امتیوں کا حضور نبی کریم ﷺ کے ساتھ تعلق زمان و مکان کی حدود سے ماورا ہے، اور یہ کہ ان کی محبت اور عقیدت کسی بھی آزمائش اور مشکل کے باوجود قائم و دائم ہے۔