کتاب اور خطاب سے تعلق لیڈر کی پہچان ہے، حقیقی لیڈر دوسروں کی ہمت بڑھاتا اور خدمت کو اپنی شناخت بناتا ہے: پروفیسر ڈاکٹر حسن محی الدین قادری

منہاج القرآن مردہ معاشرے میں زندہ قوم پیدا کر رہا ہے، شیخ الاسلام ڈاکٹر محمد طاہرالقادری امت میں علم و بیداری کا انقلاب برپا کر رہے ہیں: چیئرمین سپریم کونسل کا تقریب سے خطاب

چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری کا تحریک منہاج القرآن ضلع سیالکوٹ کے جملہ فورمز کے قائدین سے منہاج القرآن سیکرٹریٹ لاہور میں لیڈر شپ کے موضو ع پر خطاب کرتے ہوئے کہنا تھا کہ کتاب اور خطاب سے تعلق لیڈر کی پہچان ہے۔ حقیقی لیڈر دوسروں کی ہمت بڑھاتا اور خدمت کو اپنی شناخت بناتا ہے۔ منہاج القرآن مردہ معاشرے میں زندہ قوم پیدا کر رہا ہے۔ شیخ الاسلام ڈاکٹر محمد طاہرالقادری دامت برکاتہ العالیہ امت میں علم و بیداری کا انقلاب برپا کر رہے ہیں۔ لیڈرنرم مزاجی کے ساتھ خدمتِ امت کو اپنی پہچان بناتا ہے۔ انہوں نے شیخ الاسلام ڈاکٹر محمد طاہر القادری دامت برکاتہم العالیہ کے حوالے سے کہا کہ انہوں نے منہاج القرآن کا نظام کرسی پر بیٹھ کر نہیں بلکہ سفر اور جدوجہد کے ذریعے بنایا۔

پروفیسر ڈاکٹر حسن محی الدین نے کہا کہ لیڈر مشاورت پر یقین رکھتا ہے اور ہمیشہ سیکھنے اور سکھانے کا عمل جاری رکھتا ہے۔ انہوں نے نبی کریم ﷺ کی مثال دیتے ہوئے کہا کہ وہ اللہ سے سیکھتے اور امت کو سکھاتے تھے۔ انہوں نے شیخ الاسلام دامت برکاتہم العالیہ کے قول کا حوالہ دیا کہ "ایک دیوانہ بھی تمہارا استاد ہو سکتا ہے، اس سے بھی سیکھنے کی کوشش کرو۔ انہوں نے زور دیا کہ لیڈر کو کتاب سے تعلق رکھنا چاہئیے تاکہ وہ اچھا انسان اور رہنما بن سکے۔ انہوں نے کہا کہ دعوت حکمت کے ساتھ دینی چاہیے، کیونکہ حکمت حاصل کرنے والے کو خیرِ کثیر ملتا ہے۔ لیڈر کو سوچ سمجھ کر بولنا اور قدم اٹھانا چاہیے، کیونکہ بغیر تیاری کے لیڈرشپ ممکن نہیں۔

پروفیسر ڈاکٹر حسن محی الدین قادری نے کہا کہ لیڈرشپ کی تربیت گھر سے شروع ہوتی ہے۔ لیڈر وہ ہوتا ہے جو اپنے گھر میں علم کے مراکز قائم کرے، پڑھنے اور پڑھانے کے کلچر کو فروغ دے، اپنے اخلاق کو بہتر بنائے اور ہر قدم پھونک پھونک کر رکھے۔ اگر گفتگو کرے تو اچھی کرے، ورنہ خاموشی اختیار کرے۔ منہاج القرآن کی پہچان کتاب ہے، خطاب ہے، علم ہے اور قلم ہے اور یہ شیخ الاسلام دامت برکاتہم العالیہ کی شان ہے کہ وہ امت میں بیداری اور علم کا انقلاب برپا کر رہے ہیں۔

تقریب میں نائب ناظم اعلیٰ علامہ رانا محمد ادریس، قاری ریاست علی چدھڑ، علامہ اصغر علی قادری، شہزاد رؤف قادری، علامہ محمد قاسم، میاں محمد آصف، میاں محمد رضا، چوہدری محمد اشرف گجر اور باجی ذکیہ محمود سمیت دیگر رہنما شریک ہوئے۔