منہاج ویلفیئر فاؤنڈیشن کی اجتماعی شادیوں کی پروقار تقریب 14 مارچ کو ہوں گی انتظامات کے لیے کمیٹیاں تشکیل دے دی گئیں

منہاج ویلفیئر فاؤنڈیشن نے ملکی تاریخ میں غربت کیلئے ہمیشہ ایسے عملی اقدامات اٹھائے ہیں
ڈائریکٹر MWF ڈاکٹر شاہد محمود کی انتظامی کمیٹیوں کے سربراہان سے گفتگو

مہندی غریب کی بیٹی کے ہاتھوں کی بجائے سر کے بالوں میں لگنی شروع ہو جاتی ہے مگر اس کا رشتہ مانگنے کوئی نہیں آتا۔ گرانی کے اس دور میں غریب کیلئے بیٹی اور بہن کو بیاہنا انتہائی محال ہوگیا ہے مگر شیخ الاسلام ڈاکٹر محمد طاہرالقادری کی سرپرستی میں منہاج ویلفیئر فاؤنڈیشن نے ملکی تاریخ میں غربت کیلئے ہمیشہ ایسے عملی اقدامات اٹھائے ہیں جن سے اس کے مسائل کا حل نظر آیا ہے۔ منہاج ویلفیئر فاؤنڈیشن کے زیر اہتمام اس سال بھی 32 غریب اور بے سہارا بچیو ں کی اجتماعی شادیوں کی پروقار اور عظیم الشان تقریب 14 مارچ 2010ء (اتوار) مرکزی سیکرٹریٹ ماڈل ٹاؤن کے بالمقابل گراؤنڈ میں دن 10 بجے ہوگی ان خیالات کا اظہار منہاج ویلفیئر فاؤنڈیشن کے ڈائریکٹر ڈاکٹر شاہد محمود نے ماڈل ٹاؤن میں افتخار شاہ بخاری اور میاں طاہر یعقوب کے ہمراہ اجتماعی شادیوں اور انتظامات کے حوالے سے تشکیل دی گئی کمیٹیوں کے سربراہان سے گفتگو کرتے ہوئے کیا۔ انہوں نے کہا کہ ہر سال مرکزی سطح پر اجتماعی شادیوں کی تقریب کا انعقاد ہوتاہے جس میں ہر بچی کو سوا لاکھ مالیت کا جہیز دیا جائے گا اور دولہا دلہن کے 50 مہمانوں کو کھانا دیا جائے گا اس طرح تقریبا 1800 افراد کے کھانے کا انتظام کیا جائے گا۔ پنڈال کو بہت اچھی طرح سجا کر خوشی کی اس تقریب کو منایا جائے گا۔ ہر جوڑے کا نکاح الگ الگ ہوتا ہے اور اس کیلئے منہاج القرآن علماء کونسل کے علمائے کرام کی خدمات لی جاتی ہیں۔ انہوں نے بتایا کہ 14 مارچ کو ہونے والی اس تقریب کی صدارت تحریک کے مرکزی امیر فیض الرحمٰن درانی کریں گے جبکہ ناظم اعلیٰ تحریک منہاج القرآن ڈاکٹر رحیق احمد عباسی، شیخ زاہد فیاض کے علاوہ دیگر کئی وفاقی و صوبائی وزراء، پارلیمانی سیکرٹریز، سوشل ویلفیئر اور سماجی بہبود کے نمائندوں کی شرکت متوقع ہے۔ ڈاکٹر شاہد محمود نے بتایا کہ اجتماعی شادیوں کی اس تقریب کی تیاریاں تیزی سے مکمل کی جارہی ہیں۔ اجتماعی شادیوں کی اس تقریب میں ایک کرسچن جوڑا بھی ہے۔ انہوں نے بتایا کہ ہر جوڑے کو منہاج ویلفیئر فاؤنڈیشن کی جانب سے سونے کے زیور کا ایک سیٹ، جہیز کا مکمل سامان و دیگر بہت سے تحائف بھی دیے جائیں گے۔