تعلیمی اداروں کی نجکاری ظلم اور غریبوں کا استحصال ہے : امجد جٹ

تعلیم جیسے محکمے کو صوبوں میں تقسیم کرنے سے قومی یکجہتی کا خاتمہ ہو جائے گا
ظالمانہ فیصلے کے خلاف طلبہ تنظیموں کا اجلاس جلد بلایا جائے گا
مرکزی صدر مصطفوی سٹوڈنٹس موومنٹ کی طلبہ وفد سے گفتگو

مصطفوی سٹوڈنٹس موومنٹ کے مرکزی صدر امجد جٹ نے پنجاب کے 26 تعلیمی اداروں کی نجکاری کے فیصلے کو سراسر ظلم اور غریبوں کا استحصال قرار دیا ہے۔ ان اقدامات سے تعلیم صرف امیروں کیلئے رہ جائے گی اسلئے غریب کیلئے تعلیم کے راستے مسدود کرنے کی سازش کی مذمت کرتے ہیں۔ انہوں نے ان خیالات کا اظہار FC یونیورسٹی سے آئے ہوئے طلبہ کے وفد سے گفتگو کے دوران کیا۔ اس موقع پر سیکرٹری جنرل مصطفوی سٹوڈنٹس موومنٹ ساجد گوندل، صدر لاہور عبدالغفار مصطفوی، علی رضا، معظم حبیب اور دیگر طلبہ قائدین بھی موجود تھے۔ امجد جٹ نے کہا کہ تعلیم جیسے محکمے کو صوبوں میں تقسیم کرنا قومی یکجہتی کے خلاف سازش ہے۔ اس سے ملکی وحدت پارہ پارہ ہو جائے گی۔ انہوں نے کہا کہ حکومتی اقدامات کے خلاف پورے ملک میں طلبہ برادری سراپا احتجاج ہے۔ حکومت نے پہلے تعلیمی بجٹ میں کمی کر کے طلبہ کا تعلیمی قتل کیا اور اب تعلیمی اداروں کی نجکاری سے غریبوں پر تعلیم کے دروازے بند کئے جا رہے ہیں۔ انہوں نے کہا کہ اس ظالمانہ فیصلے کے خلاف طلبہ تنظیموں کا اجلاس جلد بلایا جائے گا۔