لوڈ شیڈنگ اور ہوشرباء مہنگائی غریب عوام کے خلاف مقتدر طبقے کی گھناؤنی سازش ہے : فیض الرحمان درانی

پٹرول کی مصنوعی قلت پیدا کر کے خاص طبقے نے اربوں روپے کمالیے
سیاسی جماعتوں کے ٹکٹ صرف مخصوص خاندانوں کیلئے ہیں
پاکستان عوامی تحریک کے مرکزی صدر کی لہراسب خان گوندل کی سربراہی میں آئے وفد سے گفتگو

پاکستان عوامی تحریک کے مرکزی صدر فیض الرحمن درانی نے لوڈ شیڈنگ اور ہوشرباء مہنگائی کو غریب عوام کے خلاف مقتدر طبقے کی گھناؤنی سازش قرار دیتے ہوئے کہا ہے کہ 2 سے 3 فی صد طبقے نے 97 فی صد عوام کا جینا دوبھر کر رکھا ہے۔ معاشرے سے سفید پوش طبقہ ختم ہو گیا ہے۔ یہ سب ظالمانہ اور استحصالی نظام کا کیا دھرا ہے جو ہر بار ایسی پارلیمنٹ تشکیل دیتا ہے جس میں عوام کے حقیقی نمائندوں کیلئے کوئی جگہ نہیں ہوتی۔ مخصوص خاندانوں کا ملکی سیاست پر قبضہ ہے اور ملک کی سیاسی جماعتوں کے ٹکٹ صرف انہی خاندانوں کیلئے مخصوص ہیں۔ غریب عوام کے پاس صرف حق مانگنے کا حق رہ گیا ہے۔

وہ پاکستان عوامی تحریک پنجاب کے صدر لہراسب خان گوندل کی سربراہی میں آنے والے وفد سے ملاقات کے دوران گفتگو کر رہے تھے۔ اس موقع پر جنرل سیکرٹری ایم ایچ شاہین، میاں زاہد جاوید اور دیگر قائدین بھی موجود تھے۔ فیض الرحمن درانی نے کہا کہ پٹرول کی مصنوعی قلت پیدا کر کے ایک خاص طبقے نے اربوں روپے کمالیے ہیں جبکہ اس مسئلے کے حل کیلئے حکومتی رٹ کہیں بھی نظر نہیں آ رہی۔ انہوں نے کہا کہ گذشتہ 2 سالوں کے دوران ڈیزل 41 اور پٹرول 32 روپے لیٹر مہنگا کر کے عوام کو مہنگائی کے پہاڑ تلے کچل دیا گیا ہے۔ ضرورت اس امر کی ہے کہ عوام موجودہ ظالمانہ نظام کے خاتمے کیلئے منظم جدوجہد کیلئے تیار ہوں اور اسے سمندر برد کرنے تک چین سے نہ بیٹھیں۔