جمہوریت عوام کے حقوق سے کھیلنے کے موروثی حق کا نا م نہیں۔ جی ایم ملک

اداروں کے مقابل آ جانے سے آئین موم کی ناک بن جاتا ہے

تحریک منہاج القرآن کے نائب ناظم اعلیٰ جی ایم ملک نے کہا ہے کہ جس ملک میں شخصیات مضبوط اور ادارے ایک دوسرے کے مقابل آ جائیں وہاں آئین کی حیثیت موم کی ناک سے زیادہ نہیں رہ جاتی۔ اداروں کا کمزور ہونا ملک کی معیشت اور سیاسی استحکام کیلئے زہر قاتل ہے۔ جمہوریت اس نظام کا نام ہے جس میں ہر سطح پر عوام کے حقوق کی رکھوالی کا عمل دن بدن مضبوط ہو رہا ہو مگر بدقسمتی سے پاکستان میں نام نہاد جمہوریت چند خاندانوں کے گھر کی لونڈی ہے۔ ان خیالات کا اظہار انہوں نے پاکستان عوامی تحریک پنجاب کے وفد سے ملاقات کے دوران کیا۔

اس موقع پر لہراسب خان گوندل، ایم ایچ شاہین، افضل گجر اور دیگر بھی موجود تھے۔ انہوں نے کہا کہ موجودہ نظام انتخاب میں اپوزیشن اور حکومت دو ماسک ہیں جنہیں باری باری چڑھا کر قومی خزانے پر ہاتھ صاف کئے جانے کا سلسلہ جاری ہے۔ پاکستان میں جمہوریت اس نظام کا نام رہ گیا ہے جہاں عوام کے حقوق سے کھیلنا مقتدر طبقہ اپنا موروثی حق سمجھتا ہے۔ مجبوریت کو جمہوریت کا لبادہ اُوڑھا کر عوامی حقوق پر ڈاکہ ڈالنے کا شغل کئی سالوں سے جاری ہے۔ الیکشن اور صرف الیکشن کو جمہوریت سمجھنے والے عوام کو احمقوں کی جنت میں رکھ کر قومی خزانے پر ہاتھ صاف کر رہے ہیں۔