گیاری سیکٹر میں دفاع وطن کیلئے جانوں کا نذرانہ دینے والے ہمارے فوجی جوان تا ابد زندہ رہیں گے

پاک فوج کے شہداء کیلئے کروڑوں پاکستانیوں کی آنکھیں نمناک ہیں
پاک فوج خراج تحسین کی مستحق ہے کہ ان نامساعد حالات میں ملک کا دفاع کر رہی ہے
علامہ ڈاکٹر غلام مرتضیٰ علوی کا جامع مسجد منہاج القرآن ماڈل ٹاؤن میں جمعہ کے ایک بڑے اجتماع سے خطاب

برفانی تودہ گرنے کا سانحہ یقیناً افسوسناک تھا اور اب ان فوجی جوانون کو شہید قرار دینا اس سے بھی زیادہ تکلیف دہ ہے لیکن ایک عزم اور حوصلہ اس حقیقت سے ملتا ہے کہ اللہ تعالیٰ نے شہداء کو زندہ قرار دیا ہے چنانچہ یہ واضح ہے کہ گیاری سیکٹر میں دفاع وطن کیلئے جانوں کا نذرانہ دینے والے ہمارے فوجی جوان تا ابد زندہ رہیں گے اور انکی شہادت اس بات کی گواہی دیتی رہے گی کہ انہوں نے تحفظ وطن کی خاطر ہر طرح کی تکالیف برداشت کیں حتی کہ اپنی جانیں بھی مادر وطن کیلئے قربان کر دیں۔ ان خیالات کا اظہار تحریک منہاج القرآن کے ناظم تربیت علامہ ڈاکٹرغلام مرتضیٰ علوی نے جامع مسجد منہاج القرآن ماڈل ٹاؤن میں جمعہ کے ایک بڑے اجتماع سے خطاب کرتے ہوئے کیا۔

ڈاکٹر غلام مرتضیٰ علوی نے سیاچن کے شہدا کیلئے خصوصی دعا کرتے ہوئے کہا کہ پاک فوج کے شہدا کیلئے کروڑوں پاکستانیوں کی آنکھیں نمناک ہیں۔ ساری قوم پاکستان کے محافظوں کی ہمیشہ سے مقروض ہے۔ ہم افواج پاکستان کی سلامتی اور کامیابیوں کیلئے دعا گو ہیں۔ پاکستان کی تینوں مسلح افواج راتوں کو جاگتے ہوئے سرحدوں کی نگہبانی کرتے ہیں اور اس مملکت اسلامی کے کروڑوں عوام اطمینان اور چین سے سوتے ہیں۔

ڈاکٹر غلام مرتضیٰ علوی نے اپنے خطاب میں کہا کہ اللہ تعالیٰ وطن کے ان جانباز شہیدوں کو اپنے جوار رحت میں جگہ دے اور انکے لواحقین کو صبر جمیل عطا فرمائے۔ انہوں نے کہا کہ پاک فوج خراج تحسین کی مستحق ہے کہ ان نا مساعد حالات میں ملک کا دفاع کر رہی ہے۔ پوری قوم گیاری سیکٹر کے شہدا کی بہادری شجاعت اور قربانی کو سلام پیش کرتی ہے۔

دریں اثناء ڈاکٹر غلام مرتضیٰ علوی نے سیاچن میں ہی گذشتہ دنوں ایک اور برفانی تود ے کی زد میں آ کر شہید ہونے والے دو فوجی جوانوں کے درجات کی بلندی کیلئے بھی خصوصی دعا کی۔ انہوں نے کہا کہ گیاری سیکٹر میں شہید ہونے والے اور دیگر شہدا پاکستان جنہوں نے دفاع وطن کیلئے اپنی جانوں کی قربانی دی ان کے خاندانوں کی مکمل کفالت کی جائے اور ان شہیدوں کے خاندان کے افراد کو سرکاری ملازمتیں فراہم کی جائیں۔