منہاج القرآن کے مرکزی رہنماؤں کی افواج پاکستان کے شہدا کی فیملیز سے ملاقات اور ان سے اظہار یکجہتی

منہاج القرآن کے مرکزی رہنماؤں کے وفد نے لاہور میں مقیم افواج پاکستان کے شہدا کی فیملیز سے ملاقات کی اور ان سے اظہار یکجہتی کیا، اور کہا کہ عظیم شہدا کی قربانیوں کی وجہ سے 21 کروڑ عوام چین کی نیند سوتے ہیں۔ وفد میں مرکزی سیکرٹری کوآرڈینیشن حافظ غلام فرید، راجہ محمود عزیز، میاں ممتاز حسین اور عامر حسن شامل تھے۔

وفد نے لیفٹیننٹ کرنل شہاب الدین شہید، کیپٹن کامران شہید، لیفٹیننٹ کرنل رائے فرحان علی شہید، مرزا عامر بیگ شہید، حوالدار نوید شہید، لیفٹیننٹ حیدر نذیر شہید، میجر عبدالواحد شہید، کیپٹن جہانزیب شہید، لیفٹیننٹ سید ارتضیٰ عباس گردیزی شہید، میجر علی سلطان ناصر شہید کے اہل خانہ سے ملاقات کی اور شیخ الاسلام ڈاکٹر محمد طاہرالقادری کی جانب سے گلدستے پیش کیے اور شہدا کے درجات کی بلندی کے لیے دعا کی۔ وفد نے وطن کے دفاع کے لیے جانوں کا نذرانہ پیش کرنے والے شہداء کو خراج تحسین پیش کیا۔

وفد نے 1965ء کی جنگ کے ہیرو میجر راجہ عزیز بھٹی شہید نشان حیدر کی جائے شہادت پر بھی حاضری دی اور وہاں گلدستہ رکھا۔