گیس کی قیمت میں 12 فیصد اضافے کا حکومتی اعلان مجبور اور غریب عوام کی زندگی میں آگ بھرنے کے مترادف ہے : شیخ زاہد فیاض

حکومت اپنی شاہ خرچیاں کم کرے اور اس کا بوجھ غریب عوام پر نہ ڈالے
حکومت گیس کی قیمتوں میں کئے جانیوالے حالیہ اضافہ کے فیصلے کو واپس لے
حکومت عوام کی پشت میں مہنگائی کے خنجر گھونپنے سے باز رہے
سینئر نائب ناظم اعلیٰ شیخ زاہد فیاض کی تحریک منہاج القرآن لاہور کے وفد سے گفتگو

ایسے لگتا ہے کہ حکومت نے عوام کو ریلیف دینے کا نام اشیائے ضروریہ کو مہنگا کرنا سمجھ رکھا ہے اور آئے روز بجلی، پٹرول اور گیس کی قیمتوں میں اضافہ کر کے عوام کے گرد گھیرا تنگ کیا جا رہا ہے۔ گیس کی قیمت میں 12 فیصد اضافے کا حکومتی اعلان مجبور اور غریب عوام کی زندگی میں آگ بھرنے کے مترادف ہے۔ ان خیالات کا اظہار تحریک منہاج القرآن کے سینئر نائب ناظم اعلیٰ شیخ زاہد فیاض نے تحریک منہاج القرآن لاہور کے امیر ارشاد طاہر کی قیادت میں آئے وفد سے مرکزی سیکرٹریٹ میں ملاقات کرتے ہوئے کیا۔ انہوں نے کہا کہ حکومت اپنے دعوؤں کے برعکس عوام کو ریلیف دینے کی بجائے روز بروز ان کی مشکلات میں اضافہ کر رہی ہے اور غریب بچوں سمیت خود کشیوں اور زہر خوانی پر مجبور ہو گئے ہیں۔ غریب عوام نے حکمرانوں کو اختیار دیا ہے مگر انہیں مہنگائی اور فاقوں سے مارا جا رہا ہے۔ انہوں نے کہا حکومت اپنی شاہ خرچیاں کم کرے اور اس کا بوجھ غریب عوام پر نہ ڈالے۔ حکومت کو عوام کے صبر کا پیمانہ لبریز ہونے سے قبل ایسے فوری اور قابل عمل اقدامات کرنے ہونگے جس سے ان مسائل کا حل ممکن ہو سکے۔ انہوں نے حکومت سے مطالبہ کیا کہ وہ فوری طور پر گیس کی قیمتوں میں کئے جانیوالے حالیہ اضافہ کے فیصلے کو واپس لے۔ عوام کی پشت میں مہنگائی کے خنجر گھونپنے سے باز رہے۔ انہوں نے کہا کہ گیس کی قیمتوں میں اضافہ سمجھ سے بالاتر ہے کیونکہ یہ قدرتی طور پر ملک میں موجود ہے۔