کراچی میں رینجرز کے ہاتھوں نوجوان کی سفاکانہ ہلاکت پر شدید مذمت : شیخ الاسلام ڈاکٹر محمد طاہرالقادری

بربریت کی انتہا ہے اس کے ذمہ داران قانون کی گرفت سے بچنے نہیں چاہیں
سپریم کورٹ کے از خود نوٹس پر ابتدائی فیصلہ عوامی امنگوں کے مطابق اور خوش آئند ہے
شیخ الاسلام ڈاکٹر طاہر القادری کا تحریک منہاج القرآن کی سینٹرل ورکنگ کونسل کے اجلاس میں گفتگو

شیخ الاسلام ڈاکٹر محمد طاہرالقادری نے کراچی میں رینجرز کے ہاتھوں نوجوان کی سفاکانہ ہلاکت کی شدید مذمت کرتے ہوئے کہا ہے کہ اس کے ذمہ داران کو کڑی سے کڑی سزا دی جائے۔ قانون نافذ کرنے والے ادارے ملک اور عوام کی حفاظت کیلئے ہیں نہ کہ انہیں جانوروں کی طرح مارنے کے لئے۔ یہ ملک کے خلاف گھناؤنی سازش بھی ہو سکتی ہے۔ سپریم کورٹ کے از خود نوٹس پر ابتدائی فیصلہ عوامی امنگوں کے مطابق اور خوش آئند ہے۔

وہ گذشتہ روز تحریک منہاج القرآن کی سینٹرل ورکنگ کونسل کے اجلاس میں کینیڈا سے ٹیلی فونک گفتگو کر رہے تھے۔ اس موقع پر امیر تحریک مسکین فیض الرحمن درانی، ناظم اعلیٰ ڈاکٹر رحیق احمد عباسی، سنیئر نائب ناظم اعلیٰ شیخ زاہد فیاض، بریگیڈئر (ر) اقبال احمد خان، ناظم امور خارجہ راجہ جمیل اجمل، ناظم اجتماعات جواد حامد، امیر پنجاب احمد نواز انجم، ساجد بھٹی، قاضی فیض الاسلام اور دیگر قائدین بھی موجود تھے۔ اجلاس میں متفقہ طور پر بہیمانہ واقعہ کے خلاف قرار داد مذمت منظور کی گئی۔

شیخ الاسلام ڈاکٹر محمد طاہر القادری نے کہا کہ یہ بربریت کی انتہا ہے اس کے ذمہ داران قانون کی گرفت سے بچنے نہیں چاہیں۔ ضروری ہے کہ ریاستی اداروں کے اندر کالی بھیڑوں کو بے نقاب کر کے کیفر کردار تک پہنچایا جائے۔ انہوں نے کہا کہ واقعہ کا فیصلہ اعلیٰ عدلیہ کا عوامی مسائل پر توجہ دینے کی طرف ایک قدم ہے۔ عوام امید کرتے ہیں کہ سپریم کورٹ 30 یوم کے اندر تاریخی فیصلہ دے کر ایسے واقعات کی روک تھام کیلئے ٹھوس اور سنجیدہ کردار ادا کرے گی۔