23 دسمبر کو مینار پاکستان پر ہونے والے پروگرام میں شرکت کے لیے پروفیسر حسن میر قادری آج پاکستان روانہ ہونگے

23 دسمبر 2012ء کو مینار پاکستان پر ہونے والے سیاست نہیں، ریاست بچاؤ عوامی اجتماع میں شرکت کے لیے یورپ بھر سے منہاج القرآن کے عہدیداران اور وابستگان کی پاکستان راونگی شروع ہو چکی ہے۔ منہاج یورپین کونسل کے امیر پروفیسر علامہ حسن میر قادری آج 14 دسمبر 2012ء کو پاکستان روانہ ہو رہے ہیں۔ روانگی سے قبل منہاج یورپین کونسل کے سیکرٹری میڈیا نوید احمد اندلسی سے ٹیلیفونک گفتگو میں انہوں نے کہا کہ 23 دسمبر 2012ء کا دن پاکستان میں فرسودہ انتخابی نظام کے خاتمے اور ملک میں حقیقی تبدیلی کی بنیاد ثابت ہو گا۔

شیخ الاسلام ڈاکٹر محمد طاہر القادری کی پاکستان واپسی کے موقع پر منہاج القرآن انٹرنیشنل کی طرف سے 23 دسمبر 2012ء کو مینار پاکستان (لاہور) پر پاکستان کی تاریخ کا سب سے بڑا عوامی اجتماع منعقد کرنے کا اعلان کیا گیا ہے جس میں تحریک منہاج القرآن کے کارکنان کے ساتھ ساتھ پاکستان بھر سے لاکھوں کی تعداد میں عوام الناس بھی شرکت کریں گے۔ پاکستان کے وقت کے مطابق پروگرام کا آغاز صبح 10 بجے جب کہ یورپین وقت کے مطابق صبح 6 بجے ہو گا۔