تھرپارکر میں درجنوں معصوم بچوں کی ہلاکت حکمرانوں کی نااہلی ہے: شیخ زاہد فیاض

غریب عوام کو بھوک اور افلاس کا تحفہ دینے والے حکمرانوں کو اقتدار میں رہنے کا کوئی حق حاصل نہیں
عوام ڈاکٹر طاہرالقادری کے انقلاب کاحصہ بن کر ملک میں حقیقی تبدیلی میں اپناکرداداداکریں
شیخ زاہد فیاض کی مرکزی سیکرٹریٹ میں پاکستان عوامی تحریک لاہور کے عہدیداران کے اجلاس میں گفتگو

پاکستان عوامی تحریک کے مرکزی صدر شیخ زاہد فیاض نے کہا ہے کہ تھرپارکر میں بھوک کے باعث درجنوں معصوم بچوں کی ہلاکتیں حکمرانوں کی نااہلی اور آئین پاکستان کی خلاف ورزی ہے۔ سپریم کورٹ چیف سیکرٹری کو طلب کرنے کی بجائے وزیراعلیٰ سندہ اور وزیراعظم پاکستان کو طلب کرے۔ عوام کو بنیادی حقوق نہ دینے پر آئین پاکستان کی خلاف ورزی کے مرتکب حکمرانوں کو نااہل قراردیا جائے۔ غریب عوام کو بھوک اور افلاس کاتحفہ دینے والے حکمرانوں کو اقتدارمیں رہنے کاکوئی حق حاصل نہیں ہے۔ ان خیالات کا اظہار انہوں نے مرکزی سیکرٹریٹ میں پاکستان عوامی تحریک لاہور کے عہدیداران کے اجلاس میں گفتگو کرتے ہوئے کیا۔ اس موقع پر محمد ارشاد طاہر، چودھری افضل گجر، حافظ غلام فرید، ثناء اللہ، الطاف رندھاوا اورحاجی اسحق بھی موجود تھے۔ شیخ زاہد فیاض نے کہا کہ آئین کے آرٹیکل 38کے تحت ریاست عوام کوروٹی، کپڑا، مکان، تعلیم اور صحت اوربنیادی سہولتیں دینے کی پابند ہے۔ لیکن حکمران اپنی عیاشیوں میں مگن ہیں اور عوام بھوک اور افلاس کی چکی میں پس رہے ہیں۔ حکمران اپنی کرسی بچانے کی فکر میں غریب عوام سے کئے گئے وعدے بھول کر اقتدار کے نشے میں بد مست ہاتھی بن چکے ہیں۔ آئین کے آرٹیکل 38 کی خلاف ورزی کامرتکب ہونے پر وزیراعلی سندھ اور وزیراعظم پاکستان آرٹیکل 6 کی خلاف ورزی کے مرتکب ہوئے ہیں۔ آئین کی خلاف ورزی کرنے پر عیاش حکمرانوں کو نااہل قرار دے کر جیل بھیجا جائے اور ہمیشہ کے لئے سیاست سے آؤٹ کر دیا جائے۔ انہوں نے کہا کہ معصوم جانوں کے ضیاع پر پوری قوم کے لئے لمحہ فکریہ ہے۔ انہوں نے کہا کہ ڈاکٹر طاہرالقادری نے قوم کو آئین کا شعور دیا اور بتایا کہ آئین پاکستان عوام کے حقوق کی ضمانت دیتا ہے لیکن حکمران مسلسل آئین پاکستان کی خلاف ورزی کے مرتکب ہو رہے ہیں۔ پاکستان عوامی تحریک عوام کو دعوت فکر دے رہی ہے کہ اٹھو اور ڈاکٹر طاہرالقادری کے انقلاب کاحصہ بن کر ملک میں حقیقی تبدیلی میں اپنا کردار ادا کریں۔