نوجوان وقت کی قدر کریں اور زمانۂ طالب علمی کا ہر لمحہ حصولِ علم پر صرف کریں: ڈاکٹر حسن محی الدین قادری

چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری نے کالج آف شریعہ اینڈ اسلامک سائنسز کے طلبہ کی فکری نشست سے خطاب کرتے ہوئے کہا ہے کہ اعتدال اور تقویٰ کے ساتھ زندگی گزارنے والے کبھی صراط مستقیم سے پیچھے نہیں ہٹتے۔ نوجوان سوشل میڈیا کا مثبت استعمال کریں، سوشل میڈیا کے استعمال سے زندگیاں بنتی بھی ہیں اور تباہ بھی ہوتی ہیں۔ اللہ رب العزت نے حضور نبی اکرم ﷺ کی امت کو اعتدال والی امت قرار دیا ہے، یعنی امت محمدیہ کسی بھی معاملے میں حد سے تجاوز نہیں کرتی اسی لئے نوجوان سوشل میڈیا کا استعمال کرتے ہوئے توازن کو ہر گز نہ کھوئیں۔ سوشل میڈیا کو اپنے اوپر مسلط نہ کریں، وقت کی قدر کریں اور زمانہ طالبعلمی کا ہر لمحہ حصول علم پر صرف کریں۔

ڈاکٹر حسن محی الدین قادری نے کہا کہ وقت کو بے دردی سے ضائع کرنے والے خود بھی ضائع ہو جاتے ہیں، وقت سب سے قیمتی متاع ہے۔ اللہ رب العزت نے وقت کی اہمیت کو اجاگر کرنے کیلئے اس کی قسم بھی کھائی ہے، جو وقت کو استعمال کر کے نافع علم کے ساتھ منسلک کر لیتے ہیں دونوں جہانوں میں کامیاب ٹھہرتے ہیں۔

انہوں نے مزید کہا کہ شیخ الاسلام ڈاکٹر محمد طاہرالقادری دامت برکاتہم العالیہ نے عمر بھر وقت کی قدر کی اور عبادت و ریاضت کے ساتھ مصروف مطالعہ رہے، آج بھی 24 گھنٹے کا غالب حصہ مطالعہ میں بسر کرتے ہیں، ان کی 628 سے زائد کتب شائع ہو چکی ہیں، اگر اس میں دیگر زبانوں میں ہونے والے تراجم شامل کر لئے جائیں تو یہ تعداد 12 سو سے تجاوز کر جاتی ہے۔ شیخ الاسلام کا نوجوانوں کیلئے بھی پیغام ہے کہ وقت کی قدر کریں اور زمانۂ طالب علمی کا ہر لمحہ حصولِ علم پر صرف کریں۔

فکری، تربیتی نشست میں پرنسپل ڈاکٹر محمد ممتاز الحسن باروی، ڈاکٹر محمد اکرم رانا، ڈاکٹر شبیر احمد جامی، ڈاکٹر ممتاز احمد سدیدی، صابر حسین نقشبندی، سہیل احمد قادری، جمیل حیدر، راؤ سعد اللہ، حافظ محمد آصف الازہری، حافظ محمد ابوبکر، محمد پرویز بلال و دیگر اساتذہ موجود تھے۔