اسلام کی ابتدا علم سے ہوئی اور بقا بھی علم سے وابستہ ہے: علامہ شاھد لطیف

منہاجینز فورمز کے اجلاس میں ڈاکٹر محمد فاروق رانا نے شیخ الاسلام کی کُتب کا تعارف پیش کیا
شیخ الاسلام کے یومِ پیدائش کے سلسلہ میں مرکز پر پہلی تقریب، کیک کاٹا گیا، تندرستی و سلامتی کے لیے دعائیں

منہاجینز فورمز کا خصوصی اجلاس صدر فورم علامہ شاہد لطیف کی معیت میں معنقد ہوا، اجلاس میں کالج آف شریعہ اینڈ اسلامک سائنسز کے فارغ التحصیل سکالرز نے شرکت کی۔ خصوصی اجلاس میں شیخ الاسلام ڈاکٹر محمد طاہرا لقادری کی 74ویں سالگرہ کا کیک کاٹا گیا اور ان کی صحت و تندرستی اور سلامتی کے لیے دعا کی گئی۔

اس موقع پر فریدِ ملت ریسرچ انسٹی ٹیوٹ کے ڈائریکٹر ڈاکٹر محمد فاروق رانا نے شیخ الاسلام ڈاکٹر محمد طاہر القادری دامت برکاتہم العالیہ، چیئرمین سپریم کونسل ڈاکٹر حسن محی الدین قادری، صدر منہاج القرآن انٹرنیشنل پروفیسر ڈاکٹر حسین محی الدین قادری، شیخ حماد مصطفیٰ المدنی القادری کی کُتب کا تعارف پیش کیا۔ انہوں نے کہا کہ شیخ الاسلام نے علم کا کلچر متعارف کروایا اور فکری جمود کو توڑا۔ آپ نے قرآن و حدیث، سنہ، تصوف، روحانیت، اقتصادیات، قانون سمیت جدید علوم پر سینکڑوں کُتب تحریر کیں۔ ان ساری کاوشوں کا بنیادی مقصد دین کی ہییت اصلیہ کی حفاظت اور موجودہ و آئندہ نسلوں تک اسلام کی علم و امن پر مبنی تعلیمات پہنچانا ہے۔ انہوں نے کالج آف شریعہ اینڈ اسلامک سائنسز کے فارغ التحصیل سکالرز کو جمع کرنے پر مبارکباد دی۔

صدر منہاجینز فورم علامہ شاہد لطیف نے گفتگو کرتے ہوئے کہا کہ اسلام کی ابتداء علم سے ہوئی اس کی بقا بھی علم سے وابستہ ہے۔ شیخ الاسلام ڈاکٹر محمد طاہرالقادری فروغ علم و امن کے ساتھ اسلام کی تعلیمات کو خالصتاً علم تحقیق کی بنیاد پر فروغ دے رہے ہیں۔ انہوں نے کہا کہ منہاجینز تحریک منہاج القرآن، پاکستان اور اُمت مسلمہ کا تعلیم یافتہ چہرہ ہیں۔ ہم نے جو کچھ سیکھا اسے عامۃ الناس تک پہنچانا ہماری دینی، قومی، ملی و تحریکی ذمہ داری ہے۔

منہاجین فورمز کے اجلاس میں علامہ غلام مرتضیٰ علوی، عبدالستار منہاجین، عین الحق بغدادی، عباس نقشبندی، ڈاکٹر نعیم انور نعمانی، ڈاکٹر ممتاز الحسن باروی، جواد حامد، شہزاد رسول، محمد سعید اختر نے منہاجینز کو خوش آمدید کہا۔

اجلاس کا باقاعدہ آغاز تلاوت کلامِ رحمن سے کیا گیا جس کی سعادت قاری محمد ناصر بلال نے، اورنگزیب قریشی، حسن عبداللہ قادری، محمد رضا فریدی نے بارگاہِ رسالت مآبﷺ میں گلہائے عقیدت پیش کئے۔ جب کہ حافظ سعد الرحمن علوی اور محمد عمر دراز قادری نے نقابت کے فرائض سرانجام دئے۔