شیخ الاسلام ڈاکٹر محمد طاہرالقادری کا ماہانہ مجلس ختم الصلٰوۃ علی النبی ﷺ و بڑی گیارہویں شریف عرس مبارک سیدنا غوث اعظمؓ کی تقریب سے خطاب

منہاج القرآن انٹرنیشنل کے بانی و سرپرست شیخ الاسلام ڈاکٹر محمد طاہرالقادری دامت برکاتہم العالیہ کا تحریک منہاج القرآن و بزم قادریہ کے زیر اہتمام ماہانہ مجلس ختم الصلٰوۃ علی النبیﷺ و بڑی گیارہویں شریف عرس مبارک سیدنا غوث اعظم رضی اللہ عنہ کی تقریب میں خصوصی خطاب

منہاج القرآن انٹرنیشنل و بزم قادریہ کے زیر اہتمام مرکزی سیکریٹریٹ ماڈل ٹاؤن لاہور میں مجلس ختم الصلٰوۃ علی النبیﷺ و بڑی گیارہویں شریف عرس مبارک سیدنا غوث اعظم رضی اللہ عنہ کی تقریب کا انعقاد کیا گیا۔ تقریب سے خطاب کرتے ہوئے شیخ الاسلام ڈاکٹر محمد طاہر القادری دامت برکاتہم العالیہ نے تصوف کے حقیقی مفہوم اور اس کے چار بنیادی ارکان کو بیان کرتے ہوئے کہا ہے کہ تصوف دراصل لذتِ توحید، عشقِ الٰہی، قربِ مصطفیٰ ﷺ اور اتباعِ شریعت کا نام ہے۔ حقیقی تصوف رسوم و روایات کا مجموعہ نہیں بلکہ قلب و باطن کی اصلاح، عرفانِ الٰہی اور محبتِ الٰہی کا ایک ہمہ گیر نظام ہے۔ آپ نے کہا کہ حضرت غوث الاعظمؒ نے شریعت و طریقت کے مابین ایک کامل توازن قائم کیا، جو ظاہری عبادت و پرہیزگاری کے ساتھ باطنی نورانیت اور معرفت کا حسین امتزاج ہے۔

انہوں نے کہا کہ اللہ تعالیٰ سے سچی محبت کی واحد صورت حضور ﷺ کی کامل اطاعت ہے، اور جب بندہ اس مقام پر پہنچتا ہے کہ اسے ہر سمت اللہ ہی نظر آتا ہے، تو یہی اصل تصوف ہے۔ حضرت داتا گنج بخشؓ اور حضور غوث الاعظمؓ کے ارشادات کی روشنی میں حقیقی صوفی، کامل مرید، اور فتوت (انسانی رویوں کی بلندی) کے مفاہیم کو نہایت حسین انداز میں بیان کیا گیا ہے۔ امتِ مسلمہ کی حقیقی بیداری اسی روحانی شعور، اخلاقی تربیت اور تعلقِ باللہ کی تجدید میں پوشیدہ ہے جس کی عملی تصویر حضرت شیخ عبدالقادر جیلانیؓ کی زندگی تھی۔ آپ نے مومنین کو اخلاص، انکساری، ذکرِ الٰہی اور خدمتِ خلق کو اپنا شعار بنانے کی تلقین کی، کیونکہ قربِ الٰہی کی راہ تزکیۂ نفس، اطاعتِ قرآن و سنت اور عشقِ مصطفیٰ ﷺ سے شروع ہوتی ہے۔ غوث الاعظم رضی اللہ عنہ نے اپنی پوری زندگی خلقِ خدا کو معرفتِ الٰہی اور محبتِ الٰہی کے راستے پر گامزن کرنے کے لیے وقف کر دی، اور انہی کی تعلیمات آج بھی دلوں کو منور کر رہی ہیں۔

تقریب میں انجینئر رفیق نجم، شہزاد رسول، حاجی منظور حسین، راجہ زاہد محمود، حاجی محمد اسحاق، حافظ عابد بشیر قادری، مظہر محمود علوی، رانا محمد جمیل قادری، حاجی احمد صادق، شہباز حسین بھٹی، ثاقب محمود بھٹی، محمد اقبال باجوہ، حفیظ اللہ جاوید، میاں انصر محمود، راجہ سجاد، ناظم علی رحمت، سعید اختر، سحر عنبرین، عائشہ مبشر، نورین علوی اور لاہور بھر سے آئے ہوئے خواتین و حضرات نے کثیر تعداد میں شرکت کی۔

تقریب میں ماہ ستمبر میں پڑھا گیا درود پاک 70 کروڑ 42 لاکھ 89 ہزار 753 مرتبہ اور اب تک مکمل پڑھا گیا درود پاک 08 کھرب 19 ارب 29 کروڑ 79لاکھ 15 ہزار 237 مرتبہ حضور نبی اکرم ﷺ کی بارگاہ اقدس میں پیش کیا گیا اور ملک و ملت بالخصوص امت مسلمہ کے لئے اجتماعی دعا کی گئی۔

تقریب میں تلاوت کلام پاک کی سعادت زینۃ القراء قاری اللہ بخش نقشبندی نے حاصل کی، نعت رسول مقبول ﷺ و منقبت کی سعادت حسانِ منہاج محمد افضل نوشاہی، شکیل احمد طاہر، ظہیر بلالی برادران، محمد زاہد قادری، محمد احمد قادری و برادران، محمد زید محی الدین، محمد سمیع بلالی برادران نے حاصل کی۔