منہاج القرآن انٹرنیشنل کی سپریم کونسل کے چیئرمین پروفیسر ڈاکٹر حسن محی الدین قادری کا سنٹرل ایگزیکٹو کونسل کے اجلاس سے خطاب

اصلاح معاشرہ (امربالمعروف و نہی عن المنکر) کے لئے تعلیمی، فکری، تربیتی اور دعوتی سطح پر جدوجہد بروئے کار لانا ہر کلمہ گو مسلمان پر واجب ہے، منہاج القرآن خدمت دین، خدمت انسانیت اور مصطفوی معاشرہ کی تشکیل کے خواب کو شرمندہ تعبیر کرنے کے مشن پر کاربند ہے، نظام المدارس پاکستان کے ذریعے مدارس دینیہ کے اندر تعلیمی، نصابی، تدریسی سطح پر انقلاب آفریں اصلاحات کی بنیاد رکھ دی ہے، منہاج القرآن تعلیم اور مطالعہ کتب کے کلچر کے احیاء اور اخلاقی اقدار کے فروغ کے لیے جدید ذرائع ابلاغ کے استعمال پر توجہ دے رہی ہے نوجوان ان کوششوں میں اپنی دینی ذمہ داریاں پوری کریں۔ قرآن لرننگ کے آن لائن کورسز کو زبردست پذیرائی حاصل ہو رہی ہے، امت کے ہر مسلہ کا حل قرآن و سنت کی تعلیمات میں موجود ہے۔

تعلیم کے فروغ اور شرح خواندگی میں اضافہ کے لیے تحریک منہاج القرآن اپنا دینی و قومی کردار ادا کر رہی ہے،اس وقت ہزار ہا طلبہ و طالبات مختلف سطح کے تعلیمی اداروں میں زیر تعلیم ہیں، الحمد للہ تعلیمی انسٹی ٹیوشنز کی تعداد بڑھ رہی ہے، انھوں نے بتایا بہت جلد ایک اور چارٹرڈ یونیورسٹی کا سنگ بنیاد رکھنے جا رہے ہیں، الاعظمیہ انسٹی ٹیوٹ کا تعمیراتی منصوبہ تکمیل کے آخری مرحلہ میں داخل ہو رہا ہے۔

انھوں نے اپنے خطاب میں کہا کہ منہاج القرآن کے پلیٹ فارم سے ہر سال عربی، انگریزی اور اردو زبان میں درجنوں علمی و تحقیقی کتب شائع ہو رہی ہیں، تراجم کا عالم گیر سلسلہ اس کے علاوہ ہے اس کاوش سے امت مسلمہ میں تحقیق اور مطالعہ کتب کے کلچر کا احیا ہو رہا ہے۔ اجلاس میں ناظم اعلیٰ، نائب ناظمین اعلیٰ، سربراہان شعبہ جات، فورمز صدور سمیت سنٹرل ایگزیکٹیو کونسل کے ممبران شریک ہوئے۔