منہاج یونیورسٹی لاہور میں مختلف تعلیمی شعبہ جات میں فارغ التحصیل طلبہ کے لیے ”کانووکیشن“ تقریب کا انعقاد
مجموعی طور پر 1562 فارغ التحصیل طلباء و طالبات کو ڈگریوں سے نوازا گیا
68 طلبہ کو گولڈ میڈل، 95کو رول آف آنرز، 70 طلبہ کو میرٹ سرٹیفکیٹس جبکہ 41 طلبہ کو پی ایچ ڈی کی ڈگریاں عطا کی جائیں گی
13طلبہ کو بہترین تعلیمی کارکردگی پر ایوارڈ اور فی کس ایک لاکھ روپیہ دیا گیا۔
معیاری تعلیم وتربیت کی فراہمی اور تحقیق کے فروغ کی بدولت منہاج یونیورسٹی نجی تعلیمی شعبے میں ایک بہترین اضافہ ہے۔ گورنر پنجاب سردار سلیم حیدر
طلبہ اپنے اعلیٰ اخلاق اور روشن سیرت و کردار سے دوسروں کے لیے آسانیاں پیدا کرنے کے ساتھ ساتھ ا پنی عملی زندگی میں دوسروں کی رہنمائی کریں
شیخ الاسلام پروفیسرڈاکٹر محمد طاہر القادری کا تقریب میں ویڈیو لنک خطاب
لاہور (22 نومبر2025 )منہاج یونیورسٹی لاہور کے کانووکیشن 2025 ءمیں1562طلباء و طالبات کو ڈگریوں سے نوازا گیا۔ کانووکیشن کے مہمان خصوصی گورنر پنجاب سردار سلیم حیدر، منہاج یونیورسٹی لاہور کے بورڈ آف گورنرز کے چیئرمین، تحریک منہاج القرآن کے بانی و سرپرست شیخ الاسلام پروفیسرڈاکٹر محمد طاہر القادری، ڈپٹی چیئرمین پروفیسر ڈاکٹر حسین محی الدین قادری، چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری، وائس چانسلر پروفیسر ڈاکٹر ساجد محمود شہزاد اور رجسٹرار ڈاکٹر خرم شہزاد نے شرکت و خطاب کیا اور ڈگری پروگرامز مکمل کرنے والے طلبا و طالبات کو مبارکباد دی۔
شیخ الاسلام پروفیسر ڈاکٹر محمد طاہرالقادری نے کانووکیشن میں ویڈیو لنک کے ذریعے طلبہ سے خطاب کرتے ہوئے کہا کہ تعلیمی ڈگری صرف عملی زندگی میں داخل ہونے کا ایک ذریعہ ہے، اصل مقصد انسان کی شخصیت، اخلاق اور کردار کی تکمیل ہے۔ انہوں نے طلبہ پر زور دیا کہ اب آپ پر یہ ذمہ داری عائد ہوتی ہے کہ اپنے اعلیٰ اخلاق، روشن سیرت اور مضبوط کردار کے ذریعے دوسروں کے لیے آسانیاں پیدا کریں اور معاشرے میں مثبت تبدیلی لائیں۔
شیخ الاسلام نے مزید کہا کہ نوجوان طلبہ اپنی شخصیت کا محاسبہ کریں، اپنی خوبیوں اور خامیوں کا جائزہ لیں۔ ہر کامیابی کی بنیاد خود شناسی، مسلسل سیکھنے اور خدمتِ خلق کے جذبے میں مضمر ہے۔ گورنر پنجاب سردار سلیم حیدر نے تقریب میں اظہار خیال کرتے ہوئے کہا کہ معیاری تعلیم وتربیت کی فراہمی کی بدولت منہاج یونیورسٹی نجی تعلیمی شعبے میں ایک بہترین اضافہ ہے۔ ماڈرن ایجوکیشن کے فروغ وترقی، بین المذاہب ہم آہنگی اور امن کے لیے شیخ الاسلام پروفیسر ڈاکٹر طاہرالقادری کی خدمات لائق تحسین ہیں۔ منہاج یونیورسٹی جیسا باکمال ادارہ بنانا انہی کا کمال ہے۔
انہوں نے طلبہ کو مخاطب کرتے ہوئے کہا کہ قرآن پاک ہدایت کا سر چشمہ ہے طلبہ کو چاہیے کہ حضور اکرم صلی اللہ علیہ وسلم کے اسوہ حسنہ کو اپنا رول ماڈل بنائیں۔
ڈپٹی چیئرمین بورڈ آف گورنرز منہاج یونیورسٹی لاہور پروفیسر ڈاکٹر حسین محی الدین قادری نے اپنے خطاب میں کہاکہ منہاج یونیورسٹی کوالٹی اجوکیشن کی فراہمی کے ساتھ ساتھ طلبہ کی کردار سازی، اخلاقی تربیت اور فکری مضبوطی کے لیے کوشاں ہے انہوں نے اعلیٰ تعلیمی کارکردگی کا مظاہرہ کرنے والے ایوارڈ ہولڈرز اور گولڈ میڈلسٹ طلبہ کو مبارکباد دی۔
وائس چانسلر پروفیسر ڈاکٹر ساجد محمود شہزاد نے کانووکیشن میں خطبہ استقبالیہ پیش کرتے ہوئے کہا کہ منہاج یونیورسٹی طلبہ کو نہ صرف علمی مہارت بلکہ اخلاقی تربیت اور سماجی ذمہ داری کے جذبے سے بھی آراستہ کرتی ہے۔ کانووکیشن تقریب میں مجموعی طور پر 1562 فارغ التحصیل طلباء و طالبات کو ڈگریوں سے نوازا گیا۔
68 طلبہ کو گولڈ میڈل، 95 کو رول آف آنرز، 70 طلبہ کو میرٹ سرٹیفکیٹس جبکہ 41 طلبہ کو پی ایچ ڈی کی ڈگریاں عطا کی جائیں گی۔ علاوہ ازیں بے مثال تعلیمی کارکردگی پر منہاج یونیورسٹی کے مختلف تعلیمی شعبہ جات کے13 طلبہ کو ایوارڈز اور ایک لاکھ روپے فی کس انعام دیا گیا۔
کانووکیشن میں وائس چانسلر یونیورسٹی آف ویٹرنری اینڈ اینمل سائنسز ڈاکٹر محمد یونس، ممبر بورڈ آف گورنرز منہاج یونیورسٹی خرم نواز گنڈا پو، بیرسٹر عامر حسن، بورڈ ممبرغزالہ حسن قادری، کنٹرولر امتحانات منہاج یونیورسٹی محمد عبداللہ، ڈائریکٹر منہاج ویلفیئر فاونڈیشن سید امجد علی شاہ اور سہیل احمد رضا، شہزاد رسول سمیت منہاج یونیورسٹی کے ڈینز، ایچ او ڈیزاور فارغ التحصیل طلبہ کے والدین کی بڑی تعداد نے شرکت کی۔
تبصرہ