عوام کی نگاہیں سپریم کورٹ کے آنے والے فیصلوں پر لگی ہیں : ڈاکٹر رحیق احمد عباسی

آزاد عدلیہ کے درست فیصلے ہی عوام کو مسائل کی دلدل سے نکال سکتے ہیں

تحریک منہاج القرآن کے ناظم اعلیٰ ڈاکٹر رحیق احمد عباسی نے کہا ہے کہ وکلاء کی تاریخی جدوجہد کے نتیجے میں چیف جسٹس کی بحالی کے بعد اب اعلیٰ عدلیہ پر بہت بھاری ذمہ داری آن پڑی ہے۔ ملک جن گھمبیر مسائل کا شکار ہے ان حالات میں آزاد عدلیہ کے درست فیصلے ہی عوام کو مسائل کی دلدل سے نکال سکتے ہیں۔ عوام کی نگاہیں سپریم کورٹ کے آنے والے فیصلوں پر لگی ہوئی ہیں۔ انہوں نے کہا کہ پارلیمنٹ کی بالادستی اور انتظامیہ کی غیر جانبداری کو یقینی بنانے کیلئے اقدامات کرنا ہوں گے۔ ادارے مضبوط ہوں گے تو ملک کا آئین محفوظ ہوگا وہ گزشتہ روز پاکستان عوامی تحریک کے سیکرٹری جنرل انوار اختر ایڈووکیٹ کی قیادت میں جنوبی پنجاب سے آئے پارٹی رہنماؤں کے وفد سے ملاقات کے دوران گفتگو کررہے تھے اس موقع پر ڈاکٹر تنویر اعظم سندھو بھی موجود تھے۔ انہوں نے کہا کہ سیاسی پارٹیاں شخصیا ت کی بجائے اپنے اندر حقیقی جمہوریت کو لائیں تو اس کے اثرات عوام تک پہنچے گے۔ انہوں نے کہا کہ مہنگائی، بے روزگاری اور لوڈشیڈنگ جیسے مسائل سے نجات دلانے کیلئے حکومت عوامی توقعات کے مطابق پالیسیاں تشکیل دے۔ انہوں نے کہا کہ سیاسی محاذ آرائی کبھی بھی عوام اور ملک کے مفاد میں نہیں رہی اس لیے سیاسی مسائل کو جلد حل کرکے عوامی مسائل کے حل کو ترجیح دی جائے۔