دہشت گردی ملک و قوم کے خلاف بدترین سازش ہے : ڈاکٹر محمد طاہرالقادری

عوام کا تحفظ اور قیام امن حکومت کی اولین ترجیح ہونا چاہیے
ڈاکٹر محمد طاہرالقادری کی آر اے بازار میں ہونے و بم دھماکوں کی شدید ترین الفاظ میں مذمت

بانی و سرپرست اعلیٰ تحریک منہاج القرآن شیخ الاسلام ڈاکٹر محمد طاہرالقادری نے لاہور (آراے بازار) میں ہونے والے بم دھماکوں کی شدید ترین الفاظ میں مذمت کرتے ہوئے کہا کہ دہشت گرد انسانیت کے بدترین دشمن ہیں اور ان کاکوئی مذہب نہیں۔ لندن سے ایک خصوصی پیغام میں انہوں نے لاہور بم دھماکوں میں قیمتی انسانی جانوں کے ضیاع پر گہرے دکھ اور غم کا اظہار کرتے ہوئے کہا کہ اسلام انتہاء پسندی اور ہر قسم کی دہشت گردی کی پر زور مذمت کرتا ہے ایسے عناصر انسانیت کے قاتل ہیں۔ دہشت گردی ملک و قوم کے خلاف بدترین سازش ہے۔ ڈاکٹر محمد طاہرالقادری نے کہا کہ امن و امان کی صورتحال نے عوام کو عدم تحفظ کے شدید احساس میں مبتلا کیا ہوا ہے، اس سے نجات دلانے کیلئے ہر طبقہ ہائے فکر کے موثر افراد کو اپنا کردار ادا کرنا ہوگا تاکہ ملک میں خوف و ہراس کی فضاء کا خاتمہ ہوسکے۔ انہوں نے کہا کہ عوام کا تحفظ اور قیام امن حکومت کی اولین ترجیح ہونا چاہیے اور اس مقصد کیلئے حکمرانو ں کو ٹھوس اقدامات کرنا ہونگے تاکہ ملک کو بحرانوں سے نکالا جا سکے۔انہوں نے کہا کہ مٹھی بھر دہشت گردوں نے ملک میں خوف و ہراس پھیلا یا ہوا ہے۔ دہشت گرد انسانیت کے قاتل ہیں اور حکومت کو اس سے آہنی ہاتھوں سے نبٹنا ہوگا۔ دہشت گرد ملک میں عدم تحفظ کا شدید احساس پیدا کر کے اپنے مذموم مقاصد حاصل کرنا چاہتے ہیں۔ انہوں نے شہید ہونے والوں کیلئے دعائے مغفرت کی اور لواحقین کے ساتھ اظہار ہمدردی کیا اور زخمی ہونے والوں کی جلد صحت یابی کی دعا کی۔