اعلیٰ عدلیہ کراچی کے امن کی بحالی کیلئے از خود نوٹس لے کر فوج کو یہ ذمہ داری سپرد کرے: فیض الرحمن درانی

پاکستان عوامی تحریک کے مرکزی صدر فیض الرحمن درانی نے کراچی میں انسانی خون کی ارزانی کی شدید مذمت کرتے ہوئے کہا ہے کہ حکومت اس مسئلہ کو حل کرنے میں مکمل طور پر ناکام ہے اور کراچی جیسے شہر میں روزانہ درجنوں افراد کے قتل کا تسلسل مرکزی اور صوبائی حکومت کے جواز کو ختم کر دیتا ہے۔ آرمی چیف کی طرف سے شہر قائد میں امن کی بحالی کیلئے خدمات دینے کا بیان خوش آئند ہے۔

اعلیٰ عدلیہ از خود نوٹس لے کر فوج کو یہ ذمہ داری سپرد کرے کیونکہ حکومت اس کیلئے فوج کو کبھی نہیں کہے گی۔ حکومت خصوصاً کراچی کے امن کو بحال کرنے میں بری طرح ناکام ہے اسکی بنیادی وجہ سیاسی مصلحت ہے۔ بیساکھیوں پر چلنے والی حکومت بڑے فیصلے نہیں کر سکتی اس لئے اعلیٰ عدلیہ اور فوج مل کر ملک کے اس گھمبیر مسئلے کو حل کرنے کیلئے اقدام کریں۔