موجودہ نظام انتخاب سے ربڑ سٹیمپ پارلیمنٹ جنم لیتی ہے۔ نوشابہ ضیاء

ملک میں حقیقی تبدیلی کیلئے موجودہ کرپٹ نظام انتخاب کے خلاف اٹھنا ہو گا
منہاج القرآن ویمن لیگ کی مرکزی ناظمہ نوشابہ ضیاء کا سیاست نہیں ریاست بچاؤ کارنر میٹنگ سے خطاب

پاکستان اپنوں کے غلط فیصلوں کی وجہ سے خطرناک ترین بحرانوں سے گزر رہا ہے۔ ملک کی بقا اور سالمیت داؤ پر لگ چکی ہے۔ معیشت تباہی کے دھانے پر ہے۔ ملک دیوالیہ ہو چکا ہے۔ صنعتیں بند ہونے کی وجہ سے لاکھوں مزدور بے روزگار ہو چکے۔ اقتدار پر قابض مقتدر طبقات ملک کو دونوں ہاتھوں سے لوٹ رہے ہیں اور کرپٹ نظام انتخاب انہیں ہر دفعہ اقتدار حاصل کرنے میں کامیاب بناتا ہے۔ جب تک اس فرسودہ انتخابی نظام میں بنیادی اصلاحات نہیں کی جاتیں یہ نظام انتخاب کرپٹ لوگوں کو اقتدار میں لاتا رہے گا۔

ان خیالات کا اظہار منہاج القرآن ویمن لیگ کی مرکزی ناظمہ نوشابہ ضیاء نے سیاست نہیں ریاست بچاؤ کارنر میٹنگ میں بے روزگار مزدوروں کی بیویوں اور بیٹیوں سے خطاب کرتے ہوئے کیا۔ اس موقع پر ہما میر، عطیہ بینش، گلشن ارشاد، سدرہ جبین اور ملکہ صباء بھی موجود تھیں۔انہوں نے کہا کہ موجودہ نظام انتخاب سے ربڑ سٹیمپ پارلیمنٹ جنم لیتی ہے جو صرف مقتدر طبقات کے تحفظ کے لئے ہوتی ہے۔ ملک میں حقیقی تبدیلی کیلئے موجودہ کرپٹ نظام انتخاب کے خلاف اٹھنا ہو گا۔ انہوں نے کہا کہ شیخ الاسلام ڈاکٹر محمد طاہر القادری کی قیادت میں 23 دسمبر کو مینار پاکستان میں لاکھوں کی تعداد میں خواتین اکٹھی ہو کر موجودہ نظام انتخاب کو مسترد کریں گی۔ 23 دسمبر پاکستان کی قومی زندگی میں کرپٹ نظام انتخاب و سیاست کے خلاف یادگار دن بن جائے گا۔