افواج پاکستان کو شام بھیج کر ملکی غیرت کا سودا نہ کیا جائے۔ عمر ریاض عباسی

حکومت ملک کی خود مختاری کو ڈالروں کے عوض بیچنے کی تیاری کر چکی ہے
دہشت گردوں کو جیلوں سے رہا کروا کے دہشت گردی کے لئے دوسرے ممالک بھیجا گیا

پاکستان عوامی تحریک کے مرکزی ڈپٹی سیکرٹری اطلاعات عمر ریاض عباسی نے کہا ہے کہ افواج پاکستان کو شام بھیج کر ملکی غیرت کا سودا نہ کیاجائے۔ حکومت ملک کی خود مختاری کو ڈالروں کے عوض بیچنے کی تیاری کر چکی ہے۔ پیسوں کے لئے غیروں کی خواہشات کا پاکستان کو شکار نہیں کرنا چاہیے۔ پاکستان اور افواج پاکستان پر کسی قسم کا دھبہ برداشت نہیں کیا جا ئے گا۔ حکومت ایسی سوچ سے بھی باز رہے ورنہ سخت ناقابل تلافی خمیازہ بھگتنا پڑے گا۔ کسی حکمران کو ذاتی احسانات کے بدلے کے طور پر ملک کی سالمیت بیچنے کی اجازت نہیں دی جا سکتی۔ افواج پاکستان عالم اسلام کا فخر ہیں ان کا غیر جانبدارانہ کردار ہمیشہ رہا ہے اور برقرار رہنا چاہیے۔

انہوں نے کہا کہ پاکستان کو ہمیشہ دوسرے ملکوں کی ڈکٹیشن پر چلایا جاتا رہا ہے جس کی وجہ ناکام خارجہ پالیسی ہے۔ انہوں نے کہاکہ پاکستان عوامی تحریک حکومت کی ناقص پالیسیوں پر نظر رکھے ہوئے ہے، بہت جلد عوامی ریلہ آئے گا اور کرپٹ اور نااہل حکمرانوں کو سمندر برد کرکے عبرت کا نشان بنا دیا جائے گا۔ انہوں نے کہا کہ ہزاروں دہشت گردوں کو جیلوں سے رہا کروا کے شام بھیجا گیا، اپنے ملک میں دہشت گردی کے خاتمے کی بات کرنے والے دوسرے مسلمان ممالک میں دہشت گردی کا بیج بو رہے ہیں۔ عالم اسلام کے ممالک اور دنیا کی بڑی طاقتوں کی رائے اس حوالے سے تقسیم ہو چکی ہے۔ اس صورتحال میں پاکستان مصالحانہ اور امن کی بحالی کیلئے کردار ادا نہیں کر سکتا تو کم از کم اپنی غیر جانبدارانہ حیثیت کو تو بحال رکھے۔ اپنے ملک میں دہشت گردی کے خاتمے کی باتیں کرنا اور دوسرے ملکوں میں دہشت گردی کو سپورٹ کرنے کی حکومتی منطق ناقابل فہم ہے۔