پاکستان عوامی تحریک کی مقبولیت سے حکومتی وزراء حواس باختہ ہو گئے۔ فیاض وڑائچ

ڈاکٹر طاہرالقادری کے وطن واپسی کے اعلان نے کرپٹ نظام کے ایوانوں پر کپکپی طاری کر دی ہے
ڈاکٹر طاہرالقادری کے پاکستان پہنچتے ہی سیاست کا نقشہ بدل جائے گا

پاکستان عوامی تحریک پنجاب کے جنرل سیکرٹری فیاض وڑائچ نے کہا ہے کہ ڈاکٹر طاہرالقادری نے اسی مہینے وطن واپسی کا اعلان کر کے موجودہ کرپٹ نظام کے ایوانوں پر کپکپی طاری کر دی ہے۔ نام نہادجمہوری نظام کے خلاف سازش کی باتیں کرنے والے عوام کے حقوق کے دشمن ہیں اسی لئے واویلا مچا رہے ہیں، یہ سب چور مچائے شور کے سوا کچھ نہیں ہے۔ وہ گذشتہ روز پاکستان عوامی تحریک پنجاب کے اجلاس سے خطاب کر رہے تھے۔ اس موقع پر مشتاق نو ناری ایڈووکیٹ، راجہ زاہد، حنیف سندھیلہ اور ایم ایچ شاہین بھی موجود تھے۔ انہوں نے کہا کہ ڈاکٹر طاہرالقادری کا 10نکاتی ایجنڈا عوام کو خوشحالی دینے کیلئے ہے۔ پاکستان عوامی تحریک کی مقبولیت سے حکومتی وزراء حواس باختہ ہو گئے ہیں۔ 11 مئی کے احتجاج نے ملک بھر میں پاکستان عوامی تحریک کی مقبولیت کو واضح کر دیا ہے۔ ڈاکٹر طاہرالقادری کا سیاسی فلسفہ عوام میں اس لئے مقبولیت حاصل کر رہا ہے کہ یہ لوگوں کے دلوں کی آواز ہے۔ قائد انقلاب ڈاکٹر طاہرالقادری اور عوام پاکستان کی ملاقات کے درمیان چند دنوں کا فاصلہ حائل ہے۔ ڈاکٹر طاہرالقادری کے پاکستان پہنچتے ہی سیاست کا نقشہ بدل جائے گا۔ ڈاکٹر طاہرالقادری کا جرم یہ ہے کہ انہوں نے عوام کو انکے حقوق کا شعور دے دیا ہے جو کرپٹ ایلیٹ کیلئے سوہان روح بن گیا ہے۔ 2014ء انقلاب کا سال ہو گا اس لئے کہ عوام ڈاکٹر طاہرالقادری کے ساتھ ملتے جا رہے ہیں۔