رمضان المبارک فیوض و انعامات ربانی کا گراں بہار مجموعہ ہے: سید فرحت حسین شاہ

مورخہ: 17 جون 2015ء

وہ ماہ منور طلوع ہونے والا ہے جس میں شیطانی قوتیں مغلوب اور نیکی و پرہیز گاری کی فضا غالب ہو جاتی ہے
جب رمضان المبارک کا چاند نظر آئے تو رب کے آگے ہاتھ پھیلا دیں، صلوۃ الحاجت ادا کریں
منہاج القرآن علماء کونسل کے ناظم سید فرحت حسین شاہ کا ’’مرحبا۔ ۔ ۔ ۔ ماہ رمضان کانفرنس‘‘ سے خطاب‎

منہاج القرآن علماء کونسل کے ناظم سید فرحت حسین شاہ نے کہا ہے کہ رحمت و مغفرت کا ماہ مبارک ہم پر سایہ فگن ہونے والا ہے۔ وہ ماہ مقدس قریب سے قریب آتا جا رہا ہے جسے اللہ کریم نے نزول قرآن اور رسول رحمت حضرت محمد مصطفیٰ صلی اللہ علیہ وآلہ وسلم نے رحمت، مغفرت اور جہنم سے نجات کا مہینہ قرار دیا ہے۔ وہ ماہ منور طلوع ہونے والا ہے جس میں شیطانی قوتیں مغلوب اور نیکی و پرہیز گاری کی فضا غالب ہو جاتی ہے۔ مسلم معاشرے پر روحانی نظم و ضبط کا رنگ چڑھ جاتا ہے۔ سحری کے لمحے بڑے دلاآویز اور افطار کے مناظر بڑے ایمان افروز ہوتے ہیں۔ جس طرح بہار کی آمد سے پورا موسم بدل جاتا ہے اسی طرح رمضان کی آمد سے پورا ماحول بدل جاتا ہے۔ وہ مرکزی سیکرٹریٹ ماڈل ٹاؤن میں منعقدہ ’’مرحبا۔ ۔ ۔ ۔ ماہ رمضان کانفرنس‘‘ سے خطاب کررہے تھے۔ جبکہ اس موقع پرعلامہ محمد حسین آزاد، علامہ میر آصف اکبر، علامہ عثمان سیالوی، علامہ محمد لطیف مدنی اور صاحبزادہ ظہیر احمد نقشبندی بھی موجود تھے۔ علامہ سید فرحت حسین شاہ نے کہا کہ رمضان المبارک رحمت، مغفرت اور نیکیوں کا موسم بہار ہے۔ رمضان المبارک فیوض و انعامات ربانی کا گراں بہار مجموعہ ہے۔ یہ دین و دنیا کی بھلائی اورآخرت کی کمائی کا مہینہ ہے۔ حضور صلی اللہ علیہ وآلہ وسلم نے رمضان المبارک کو صبر و ضبط اور ایثار کا مہینہ قرار دیا۔ ضبط نفس اور ہمدردی و غم خواری ماہ صیام سے خاص نسبت رکھتے ہیں۔ انہوں نے کہا کہ رمضان المبارک کی آمد آمد ہے۔ ہمیں یہ طے کرنا ہے کہ رحمت اور برکت کے اس بہتے دریا سے ہم کس طرح زیادہ سے زیادہ جھولیاں بھر سکتے، کیسے زیادہ نیکیاں سمیٹ سکتے ہیں اور 30دن کی اس مشق سے ہم کس طرح اپنی شخصیت کے اندر ایک نکھار پیدا کر سکتے ہیں۔ ہمیں استقبال رمضان کی تیاری کرنا ہے اور پھر دوران رمضان خیر اور بھلائیاں سمیٹنی ہیں اور اپنے اندر سے ایک نیا انسان دریافت کرنا ہے۔ جب رمضان المبارک کا چاند نظر آئے تو رب کے آگے ہاتھ پھیلا دیں، صلوۃ الحاجت ادا کریں اور رب سے رمضان کریم کی بابرکت ساعتوں میں برکت کی دعائیں مانگیں اور وہ تمام دعائیں جو ماہ مقدس کے حوالے دل میں ہوں مانگیں کہ رب مہربان اور دینے والا ہے۔

تبصرہ

تلاش

ویڈیو

Minhaj TV
Quran Reading Pen
We Want to CHANGE the Worst System of Pakistan
Presentation MQI websites
Advertise Here
Top