ڈاکٹر محمد طاہرالقادری کی مولانا سمیع الحق کے قتل کی شدید الفاظ میں مذمت
مولانا سمیع الحق کی قاتلانہ حملے میں شہادت پر دلی افسوس ہے، ملک نامور دینی رہنما اور مدبر سیاستدان سے محروم ہو گیا، قاتلوں اور انکے سرپرستوں کو بلا تاخیر گرفتار کیا جائے۔
— ڈاکٹر طاہرالقادری (@TahirulQadriUR) November 2, 2018
مولانا سمیع الحق کی شہادت سے ملک نامور عالم دین اور مدبر سیاستدان سے محروم ہو گیا
حملہ آوروں انکے سرپرستوں کو فی الفور گر فتار کر کے قانون کے کٹہرے میں لایا جائے: ڈاکٹر طاہرالقادری
خرم نواز گنڈاپور کا قتل میں ملوث عناصر کو فوری گرفتار کر کے قرار واقعی سزا دینے کا مطالبہ
لاہور (2 نومبر 2018) تحریک منہاج القرآن کے بانی وسربراہ پی اے ٹی ڈاکٹر محمد طاہرالقادری نے مولانا سمیع الحق کی شہادت پر اظہار افسوس کرتے ہوئے کہا ہے کہ مولانا سمیع الحق کی شہادت سے ملک نامور عالم دین اور مدبر سیاستدان سے محروم ہو گیا ہے۔ مولانا سمیع الحق کا قتل ملک کو بد امنی کی جانب لیجانے کی مذموم سازش ہے جسکی جتنی بھی مذمت کی جائے کم ہے۔ ڈاکٹر طاہرالقادری نے کہا کہ مولانا سمیع الحق کے قتل کی اعلیٰ سطح پر تحقیقات کی جائیں، حملہ آوروں اور انکے سرپرستوں اورملوث دہشتگرد عناصر کو فی الفور گر فتار کر کے قانون کے کٹہرے میں لایا جائے۔ سربراہ پی اے ٹی نے مولانا سمیع الحق کے بیٹے مولانا حامد الحق اور دیگر سوگوار لواحقین سے دلی تعزیت اور ہمدردی کا اظہار کرتے ہوئے انکی مغفرت اور سوگواران کیلئے صبر جمیل کی دعا کی ہے۔
دریں اثناء پاکستان عوامی تحریک کے سیکرٹری جنرل خرم نواز گنڈا پور، مرکزی سیکرٹری اطلاعات نور اللہ صدیقی، علامہ امداداللہ خان، علامہ میر آصف اکبر، علامہ سید فرحت حسین شاہ، بشارت جسپال، فیاض وڑائچ، جی ایم ملک و دیگر رہنماؤں نے بھی مولانا سمیع الحق کی شہادت پر افسوس کا اظہار کرتے ہوئے واقعے کی شدید مذمت کی ہے۔ سیکرٹری جنرل پاکستان عوامی تحریک خرم نواز گنڈا پور نے دہشتگردی کی سفاکانہ واردات میں ملوث شر پسند عناصر کو فوری گرفتار کر کے قرار واقعی سزا دینے کا مطالبہ کیا ہے۔
تبصرہ