ڈاکٹر حسین محی الدین قادری نے GIFA کا گلوبل اسلامک ایوارڈ جیت لیا

منہاج القرآن انٹرنیشنل کے صدر اور منہاج یونیورسٹی لاہور کے بورڈ آف گورنرز کے ڈپٹی چیئرمین ڈاکٹر حسین محی الدین قادری کو اسلامک اکنامکس اینڈ فنانس کے موضوع پر بے مثال تحقیقی خدمات انجام دینے پر انہیں گلوبل اسلامک فنانس ایوارڈ سے نوازا گیا، یہ ایوارڈ انہیں ساؤتھ افریقہ کے شہر کیپ ٹاؤن میں ”GIFA“ کی طرف سے دیا گیا۔ ایوارڈ تقریب میں ساؤتھ افریقہ کی ممتاز سیاسی شخصیات، اراکین اسمبلی، وزراء، دانشور، بینکرز اور انٹرنیشنل آرگنائزیشنز اور کمپنیوں کے چیف ایگزیکٹوز نے شرکت کی۔

ڈاکٹر حسین محی الدین قادری نے حال ہی میں ”بزنس ایتھکس ان اسلام“ کے عنوان سے پانچ سو صفحات پر مشتمل کتاب تحریر کی جسے اسلامک بینکنگ سیکٹر اور اسلامی معاشی ماہرین میں بے حد پذیرائی ملی، انہوں نے اپنی اس کتاب میں اسلام کی معاشی اخلاقیات اور اسلامی معیشت کے بنیادی اصولوں پر قرآن و سنت کے تناظر میں روشنی ڈالی، ان کی اس تحقیقی خدمت کو بے حد سراہا گیا ہے۔

ایوارڈ ملنے کے بعد گفتگو کرتے ہوئے ڈاکٹر حسین محی الدین قادری نے کہا کہ یہ ایک خوشی کا موقع ہے جس پر میں اللہ تعالیٰ کا جتنا بھی شکر ادا کروں کم ہے، انہوں نے کہا کہ اسلام سیاست، معیشت سمیت ہر موضوع پر رہنمائی مہیا کرتا ہے، اسلام کے معاشی نظام پر تحقیق کرنے پر ملنے والا ایوارڈ پاکستان کا اعزاز ہے۔ انہوں نے کہا کہ اسلام کا معاشی نظام اسلامی اخلاقیات تجارت پر زور دیتا ہے۔