منہاج ویلفیئر فاؤنڈیشن کی طرف سے مستحقین میں راشن کی تقسیم

لاہور (28 اپریل 2021ء) منہاج ویلفیئر فاؤنڈیشن کی طرف سے ہزاروں مستحق خاندانوں میں راشن تقسیم کیا گیا، کنٹری ڈائریکٹر سید امجد علی شاہ نے ویلفیئر کے مرکزی دفتر میں منہاج القرآن انٹرنیشنل کے ناظم اعلیٰ خرم نواز گنڈاپور کے ہمراہ مستحقین، بیوگان اور کم آمدنی والے خاندانوں میں راشن کے بیگ تقسیم کئے۔

اس موقع پر گفتگو کرتے ہوئے خرم نواز گنڈاپور نے کہا کہ اصلاح احوال اور خدمت انسانیت منہاج القرآن کی نظریاتی عمارت کے دو اہم ستون ہیں، شیخ الاسلام ڈاکٹر محمد طاہرالقادری نے جہاں خدمت دین کے لیے منہاج القرآن کو قائم کیا وہاں انسانیت کی خدمت کے لیے منہاج ویلفیئر فاؤنڈیشن قائم کی۔ انھوں نے کہا کہ منہاج ویلفیئر فاؤنڈیشن ہر سال رمضان المبارک میں غریب خاندانوں میں راشن تقسیم کرتی ہے اس کار خیر کے ذریعے موجودہ مہنگائی اور گرانی کے دور میں غریب خاندانوں کو ممکنہ حد تک ریلیف فراہم کرنے کی کوشش کی جاتی ہے۔

منہاج ویلفیئر فاؤنڈیشن کے کنٹری ڈائریکٹر سید امجد علی شاہ نے گفتگو کرتے ہوئے کہا کہ اللہ کی توفیق سے ہر سال کی طرح اس سال بھی منہاج ویلفیئر فاؤنڈیشن کو ہزاروں غریب خاندانوں کی مدد کرنے کی توفیق میسر آئی۔ انھوں نے بتایا کہ راشن کی تقسیم کے دوران کرونا وائرس کی وبا کے باعث صحت کے عالمی اور قومی اداروں کے ایس او پیز پر عمل درآمد کو یقینی بنایا گیا ہے، انھوں نے کہا کہ منہاج ویلفیئر فاؤنڈیشن مخیر حضرات کے تعاون سے فوڈ سپورٹ کے ساتھ ساتھ مستحق طلباء کی تعلیم، تھر اور چولستان میں پینے کے صاف پانی کی فراہمی، اجتماعی شادیوں اور وسیلہ روزگار جیسے فلاحی منصوبہ جات چلا رہی ہے اور خدمت انسانیت میں پیش پیش ہے۔