بارسلونا: 10 روزہ فن خطابت و نقابت کورس کی اختتامی تقریب

منہاج القرآن انٹرنیشنل سپین کے زیراہتمام میں 10 روزہ فن خطابت و نقابت کورس کی اختتامی تقریب بارسلونا میں منعقد ہوئی، جس میں کورس کے شرکاء بچوں میں فن خطابت و نقابت کے سرٹیفیکیٹ تقسیم کیے گئے۔ اس موقع پر فن خطابت و نقابت کورس کے ٹرینر حافظ محمد موسٰی کا کہنا تھا کہ فن تقریر سیکھنا ہر بچے کا تربیتی و تعلیمی خواب ہے اور یہی بچے ہمارا روشن مستقبل ہیں۔ انہوں نے کہا کہ شیخ الاسلام ڈاکٹر محمد طاہر القادری نے یورپ میں مشن منہاج القرآن کا آغاز اسی وجہ سے کیا تھا کہ نوجوان نسل کے دلوں کو عشق مصطفٰی صلی اللّٰہ علیہ وآلہ وسلم سے سیراب کیا جائے، یہ فن کورس اس تربیتی عمل کا حصہ ہے۔

تقریب میں حسنات ہاشمی ایڈوکیٹ صدر منہاج القرآن سپین، اقبال چوہدری (نائب صدر منہاج القرآن سپین)، سیاسی و سماجی شخصیت جاوید مغل اور راجہ شفیق کیانی نے بھی شرکت کی۔

اس سے پہلے فن نقابت کورس تقریب کا آغاز تلاوت قرآن پاک سے ہوا ، جس کی سعادت قاری عطاء المصطفٰی نقشبندی نے حاصل کی۔ حافظ عاطف احتشام نے بارگاہ رسالت ماٰب میں حاضری پیش کی۔ تقریب میں فن خطابت و نقابت کورس سیکھنے والے بچوں نے اسٹیج پر آکر  میں اپنے خیالات کا اظہار کیا، جسے شرکاء نے خوب سراہا۔ اس موقع پر والدین کی طرف سے حافظ محمد موسٰی کو کورس کے کامیاب انعقاد پر مبارکباد بھی پیش کی  گئی۔