قرآن حکیم تخلیق کائنات کے اسرار ظاہر کرنے والا نسخہ ہے: پروفیسر ڈاکٹر حسین محی الدین

عروج اور کامیابیوں کے لئے قرآن حکیم سے رہنمائی لینا ہوگی: صدر منہاج القرآن انٹرنیشنل
آغوش کمپلیکس میں منہاج انسٹی ٹیوٹ آف قراءت اینڈ تحفیظ القرآن کے زیراہتمام منعقدہ محفل حسن قراءت سے خطاب
ڈاکٹر ساجد محمود شہزاد، جی ایم ملک، کرنل (ر) مبشر اقبال، راجہ زاہد محمود، عباس نقشبندی و دیگر رہنماؤں کی شرکت

لاہور (8 فروری 2023ء) پروفیسر ڈاکٹر حسین محی الدین قادری صدر منہاج القرآن انٹرنیشنل نے کہا ہے کہ قرآن حکیم تاجدارِ کائنات ﷺ کا وہ زندہ معجزہ ہے جو آج ہمارے درمیان موجود ہے۔ صحابہ کرام قرآن مجید سے ہمیشہ اپنا گہرا تعلق قائم رکھتے۔ قرآن کریم قیامت تک آنے والے مسلمانوں کے لیے راہ ہدایت ہے اور یہ تشنگان علم کو سیراب کرتا رہے گا۔ جب قرآن کے ساتھ روح، نفس اور جسم کے رشتے پختہ ہو جائیں گے تو پھر قرآن رشتہ معرفت عطاء کرتا ہے۔ قرآن سے محبت اور احترام کا رشتہ استوار کرنا ہوگا پھر ہمیں قرآن کے فیوض و برکات نصیب ہوں گے۔ قرآن حکیم تخلیق کائنات کے اسرار ظاہر کرنے والا نسخہ ہے۔ امت مسلمہ کو عروج اور کامیابیوں کے لئے قرآن حکیم سے رہنمائی لینا ہوگی۔

شیخ الاسلام ڈاکٹر محمد طاہرالقادری نے اپنی تحریک کا نام منہاج القرآن اس لئے رکھا تا کہ یہ قرآن مجید سے فیض لیکر لوگوں تک پہنچائے۔ اس تحریک کا منشور قرآن ہے، اس تحریک کا پیغام یہی ہے کہ قرآن کے ساتھ ایسا تعلق استوار کرلیں کہ پھر زندگی کے کسی معاملے میں کوئی آپ کوشکست نہ دے سکے۔ ان خیالات کا اظہار انہوں نے آغوش کمپلیکس میں منہاج انسٹی ٹیوٹ آف قراءت اینڈ تحفیظ القرآن کے زیراہتمام منعقدہ محفل حسن قراءت سے خطاب کرتے ہوئے کیا۔ تحفیظ القرآن کے بچوں نے خوبصورت لہجے میں قرآن حکیم کی تلاوت کی تو محفل سبحان اللہ کی صداؤں سے گونج اٹھی۔

محفل حسن قراءت میں ملک پاکستان کے نامور قاری اللہ بخش نقشبندی، قاری علی حسن، قاری سید خالد حمید کاظمی، قاری عبدالماجد نور، قاری سردار انعام اللہ نعیمی نے خصوصی شرکت کی۔

تحفیظ القرآن کے طالب علم محمد حسان امجد و دیگر طلباء نے قرآن مجید کی تلاوت کرکے سماں باندھ دیا۔ محفل حسن قراءت میں وائس چانسلر منہاج یونیورسٹی ڈاکٹر ساجد محمود شہزاد، جی ایم ملک، ڈائریکٹر آغوش کرنل (ر) مبشر اقبال، راجہ زاہد محمود، پرنسپل تحفیظ القرآن عباس نقشبندی، پرنسپل آغوش عمران ظفر بٹ، شعیب طاہر، جواد حامد، الطاف حسین رندھاوا، حاجی منظور حسین، نوید بٹ، رانا منظور احمد خان، ملک ارشد، رانا وحید شہزاد اور آغوش کمپلیکس و تحفیظ القرآن کے طلباء و سٹاف ممبران نے شرکت کی۔