اسلام خواتین کے حقوق کا سب سے بڑا علمبردار ہے: شیخ الاسلام ڈاکٹر محمد طاہرالقادری
سکالرز ویمن امپاورمنٹ کے حوالے سے اسلام کے نقطہ نظر کا بغور مطالعہ کریں
لاہور (8 مارچ 2023) تحریک منہاج القرآن کے بانی و سرپرست شیخ الاسلام ڈاکٹر محمد طاہرالقادری نے یومِ خواتین پر اپنے پیغام میں کہا کہ اسلام خواتین کے حقوق کا سب سے بڑا علمبردار اور محافظ دین ہے۔ اسلام کی روشن تعلیمات سے قبل خواتین کی حالت ناگفتہ بہ تھی۔ غلاموں کی طرح خواتین کی خرید و فروخت ہوتی تھی۔ خواتین کو بزورِ طاقت غلام بنایا جاتا اور بطور انسان ان کے کوئی حقوق نہ تھے۔ پیغمبر اسلام ﷺ نے عورت کو سوسائٹی کا باوقار فرد قرار دیا اور خواتین پر تعلیم، روزگار کے دروازے کھولے اور خواتین کو ماں، بہن، بیوی، بیٹی کے رشتوں کی صورت میں ایک معتبر شناخت دی۔شیخ الاسلام ڈاکٹر محمد طاہرالقادری نے دنیا بھر کے سکالرز، مفکرین کو دعوت دی کہ ویمن امپاورمنٹ کے حوالے سے اسلام کی تعلیمات کا بغور مطالعہ کریں۔
دریں اثناء منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے خواتین کے عالمی دن کے موقع پر اپنے پیغام میں کہا کہ اسلام نے خواتین کو وراثت میں حصہ دار بنا کر اس کا معاشی تحفظ کیا اور خبردار کیا کہ عورت کو کمزوراور مظلوم نہ سمجھا جائے۔ قبل از اسلام لڑکیوں کو زندہ درگور کرنے کی غیر انسانی رسم عام تھی، خواتین پر تعلیم اور معاش کے دروازے بند تھے۔ اسلام نے ان تمام ظالمانہ رسومات کو بیک جنبش قلم منسوخ و مسترد کردیا اور عورت کو وہ حقوق عطا کیے جس سے وہ معاشرے میں عزت و تکریم کی مستحق قرار پائی۔
منہاج القرآن انٹرنیشنل کے صدر پروفیسر ڈاکٹر حسین محی الدین قادری نے اپنے پیغام میں کہا کہ اسلام خواتین کو حصول تعلیم اور معاشی سرگرمیوں میں فعال کردار ادا کرنے کی اجازت بھی دیتا ہے اور حوصلہ افزائی بھی کرتا ہے۔ اسلام کی اُلوہی تعلیمات کا آغاز اِقْرَاْ سے ہوا یعنی مرد و زن پر حصول علم کے یکساں دروزے کھولے گئے۔ حضور نبی اکرم ﷺ نے مردوں کی طرح خواتین کی تعلیم و تربیت کو بھی اہم اور ناگزیر قرار دیا۔ تحریک منہاج القرآن انہی مصطفوی تعلیمات کے مطابق ویمن امپاورمنٹ کے لیے اپنا دینی، ملی و قومی کردار ادا کررہی ہے۔
منہاج القرآن انٹرنیشنل کے نائب صدر بریگیڈیئر (ر) اقبال احمد خان نے اپنے بیان میں کہا کہ تحریک منہاج القرآن ویمن امپاورمنٹ اور خواتین کے عزت و احترام کے لیے گفتگو کرنے کی حد تک محدود نہیں رہی بلکہ خواتین کی تعلیم و تربیت کے لیے اپنے وسائل سے عظیم الشان تعلیمی ادارے قائم کئے ہیں۔ ان میں منہاج کالج برائے خواتین اور ویمن کالج خانیوال سرفہرست ہیں۔ کالج آف شریعہ اینڈ اسلامک سائنسز میں بھی خواتین کے لیے تعلیم کے یکساں مواقع مہیا کئے گئے ہیں۔ ہم یہ بات فخر سے کہہ سکتے ہیں کہ خواتین کے سماجی، معاشی استحکام کے لیے جتنا کام شیخ الاسلام ڈاکٹر محمد طاہرالقاری اور ادارہ منہاج القرآن نے کیا کسی اور تحریک یا جماعت نے نہیں کیا۔
ناظم اعلیٰ خرم نواز گنڈاپور نے کہا کہ خواتین کے عالمی دن کے موقع پر منہاج القرآن ویمن لیگ (وائس) کے زیراہتمام عظیم الشان کانفرنس منعقد کی گئی اور بیداری شعور مہم کا آغاز کیا گیا۔ خواتین کو سوسائٹی کا مفید فرد بنانے کے لیے انہیں زیورِ علم سے آراستہ کرنا ہوگا۔ الحمدللہ تحریک منہاج القرآن یہ دینی و ملی فریضہ بطریق احسن انجام دے رہی ہے۔
تبصرہ