اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ (انسائیکلوپیڈیا آف حدیث سٹڈیز) کی اسلام آباد میں تقریب رونمائی

شیخ الاسلام ڈاکٹر محمد طاہرالقادری نے انسائیکلوپیڈیا آف حدیث سٹڈیز
کے ذریعے حدیث کے علم کو ہر جہت سے عام فہم بنا کر عام کیا: ڈاکٹر حسن محی الدین قادری

چیئرمین سپریم کونسل منہاج القرآن انٹرنیشنل نے اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ کی تقریبِ رونمائی میں خصوصی شرکت اور خطاب کیا، تقریب سے حجۃ المحدثین شیخ الاسلام ڈاکٹر محمد طاہرالقادری دامت برکاتہم العالیہ نے بھی خطاب فرمایا۔

شیخ الاسلام ڈاکٹر محمد طاہر القادری کے تالیف کردہ انسائیکلوپیڈیا آف حدیث سٹڈیز کی پاک چائنہ سنٹر اسلام آباد میں منعقدہ تقریب رونمائی میں علماء و مشائخ، علوم اسلامیہ کے محققین، اور دانشور حضرات نے شیخ الاسلام کو انسائیکلوپیڈیا کی تالیف پر مبارکباد اور زبردست الفاظ میں ہدیہ تبریک پیش کیا۔

تقریب سے صاحبزادہ ڈاکٹر ساجد الرحمن چیئرمین سیرت چیئر علامہ اقبال اوپن یونیورسٹی و سجادہ نشین بگھار شریف، چیئرمین اُمت واحدہ پاکستان علامہ محمد امین شہیدی، امیر متحدہ جمیعت اہلحدیث پاکستان ضیاء اللہ شاہ بخاری، علامہ عارف الواحدی مرکزی نائب صدر شیعہ علماء کونسل و ممبر اسلامی نظریاتی کونسل، علامہ پیر سید عظمت حسین شاہ مہتمم جامعہ انوار القرآن راولپنڈی، جامعہ محمدیہ اسلام آباد کے پرنسپل ڈاکٹر تنویر علوی، ثناءاللہ الازہری پروفیسر بحریہ یونیورسٹی اسلام آباد و ترجمان دار العلوم محمدیہ غوثیہ بھیرہ شریف، پیر محمد شمس العارفین صدیقی سجادہ نشین آستانہ عالیہ نیریاں شریف آزاد کشمیر، ڈاکٹر سید انور شاہ سابق چیف جسٹس وفاقی شرعی عدالت، سمیت علماء و مشائخ، دانشور اور مختلف شعبہ ہائے زندگی سے تعلق رکھنے والی شخصیات کی شرکت و خطاب

پیر شمس العارفین صدیقی سجادہ نشین آستانہ عالیہ نیریاں شریف آزاد کشمیر نے اظہار خیال کرتے ہوئے کہا کہ آج کے اس دور میں جب سوشل میڈیا اور ابلاغ کے دیگر ذرائع کے ذریعے ہر طرف سے اسلامی اقدار و عقائد پر حملے ہو رہے ہیں، پروفیسر ڈاکٹر محمد طاہر القادری دامت برکاتہم العالیہ نے’اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ اُمت مسلمہ کو تحفہ دیا ہے۔ یہ اللہ رب العزت کا خاص انعام ہے کہ وہ ہر صدی میں ایک ایسا شخص پیدا فرماتا ہے جو دین کی حفاظت کرتے ہوئے امت کی راہنمائی کا فریضہ سرانجام دیتا ہے۔ آپ آج کے دور کا قیمتی اثاثہ ہیں۔ منہاج القرآن انٹرنیشنل کی جملہ قیادت کو اس عظیم سعادت پر مبارکباد پیش کرتا ہوں اور اُمت مسلمہ کو دعوت فکر دیتا ہوں کہ اس شخصیت کے دست و بازو بنیں جو ہر سطح پر حقیقی معنوں میں اسلام کی درست ترجمانی کرسکتا ہے۔

ثناءاللہ الازہری پروفیسر بحریہ یونیورسٹی اسلام آباد و ترجمان دار العلوم محمدیہ غوثیہ بھیرہ شریف نے اظہار خیال کرتے ہوئے کہا کہ میں حجۃ المحدثین شیخ الاسلام ڈاکٹر محمد طاہر القادری کو اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ کی تالیف پر ہدیہ تبریک پیش کرتا ہوں۔

جامعہ محمدیہ اسلام آباد کے پرنسپل ڈاکٹر تنویر علوی نے اظہارِ خیال کرتے ہوئے کہا کہ اللہ رب العزت ڈاکٹر محمد طاہر القادری کی یہ کاوش اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ منظور و مقبول فرمائے۔ یقیناً انسائیکلوپیڈیا آف حدیث ان کی زندگی بھر کے مطالعۂ حدیث کا نچوڑ ہے۔ اللہ تعالیٰ ان کے علم و عمل میں مزید برکتیں عطاء فرمائے۔

علامہ پیر سید عظمت حسین شاہ مہتمم جامعہ انوار القرآن راولپنڈی نے اظہار خیال کرتے ہوئے کہا کہ شیخ الاسلام ڈاکٹر محمد طاہر القادری کو اللہ تعالیٰ نے برکات کا ذخیرہ عطاء فرمایا ہے۔ اللہ تعالیٰ نے ان کے وقت میں برکت میں ڈال دی ہے اور ان سے اتنا بڑا کام لیا ہے۔ تحریک منہاج القرآن اور اُن کی پوری ٹیم مُبارکباد کی مستحق ہے۔ انسائیکلو پیڈیا آف حدیث اللہ رب العزت کی عطاء کردہ بہت بڑی نعمت ہے۔

علامہ عارف الواحدی مرکزی نائب صدر شیعہ علماء کونسل و ممبر اسلامی نظریاتی کونسل نے اظہار خیال کرتے ہوئے کہا کہ شیخ الاسلام ڈاکٹر محمد طاہر القادری کو اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ تالیف کرنے پر مبارکباد پیش کرتا ہوں۔ علم صرف حافظے سے نہیں بلکہ اللہ رب العزت کی خاص عطاء سے حاصل ہوتا ہے۔ جو شخص قرآن و حدیث کے علم کو آگے پھیلائے گا کامیابیاں و کامرانیاں اس کے قدم چومیں گی۔ شیخ الاسلام ڈاکٹر محمد طاہر القادری جیسی شخصیات اُمتِ مسلمہ اور مملکت خدا داد پاکستان کا فخر ہیں۔

امیر متحدہ جمیعت اہلحدیث پاکستان سید ضیاء اللّٰہ شاہ بخاری نے اظہار خیال کرتے ہوئے کہا کہ اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ کی رونمائی کی اس تقریب میں شامل ہونا ایک شرف اور اعزاز کی بات ہے۔ اللّٰہ تعالیٰ نے حضرت شیخ الاسلام ڈاکٹر محمد طاہر القادری حفظہ اللہ کو 60 جلدوں پر مشتمل عظیم الشان انسائیکلو پیڈیا تحریر کرنے کی توفیق عطاء فرمائی ہے، یہ اعزاز اللہ رب العزت کی توفیق اور اس کے فضل کے بغیر ممکن نہیں۔

چیئرمین اُمت واحدہ پاکستان علامہ محمد امین شہیدی نے اظہار خیال کرتے ہوئے کہا کہ شیخ الاسلام ڈاکٹر محمد طاہر القادری دامت برکاتہم العالیہ نے امت کو جوڑنے اور امت کے مشترکات پر بہت کام کئے ہیں، ان کی یہ علمی کاوش اَلْمَوْسُوْعَۃُ الْقَادِرِیَّۃ فِي الْعُلُوْمِ الْحَدِیْثِیَّۃ صدیوں تک امت مسلمہ کی راہنما بھی بنے گی اور امت کو جوڑنے کا سبب بھی بنے گی۔ اللہ رب العزت ان کی توفیقات خیر میں مزید اضافہ فرمائے اور اُمت ان کے اس علمی کام سے استفادہ کرسکے۔

صاحبزادہ ڈاکٹر ساجد الرحمن چیئرمین سیرت چیئر علامہ اقبال اوپن یونیورسٹی و سجادہ نشین بگھار شریف نے اظہارِ خیال کرتے ہوئے کہا کہ شیخ الاسلام ڈاکٹر محمد طاہر القادری ایک شخصیت نہیں بلکہ ایک فکر، فلسفہ، تحریک اور اس عہد کی علمی تاریخ کا نام ہے۔