منہاج القرآن علماء کونسل لاہور کے زیراہتمام ’’ شان علی المرتضیٰؑ کانفرنس‘‘ کا انعقاد

حضرت علیؑ عظیم سپہ سالار، جرات و شجاعت کے پیکر، علم و حکمت کا بحر بیکراں، خلیفۃ المسلمین تھے
حضرت علیؑ کی پوری زندگی صبر و استقامت کا مظہر تھی:مفتی غلام اصغر صدیقی
مولا علیؑ کےافکار اور عمل کو اپنانے سے معاشرہ امن و سکون کا گہوارہ بن سکتا ہے: ڈاکٹر علامہ میر آصف اکبر
کانفرنس میں علامہ اشفاق چشتی، مفتی خلیل حنفی، علامہ عثمان سیالوی، علامہ عبد الخالق باروی کی شرکت

لاہور (14 جنوری2025) منہاج القرآن علما کونسل لاہور کے زیراہتمام یوم ولادت سیدنا علی المرتضیٰ وجہہ الکریم کی مناسبت سے’’ شان علی المرتضیٰؑ کانفرنس‘‘ کا انعقاد کیا گیا۔ کانفرنس کی صدارت مرکزی صدر منہاج القرآن علما کونسل مفتی غلام اصغر صدیقی نے کی۔ ناظم اعلیٰ نظام المدارس پاکستان علامہ ڈاکٹر میر آصف اکبر قادری سمیت منہاج القرآن علما کونسل کے رہنمائوں نے کانفرنس میں شرکت کی۔ کانفرنس میں شریک مقررین نے حضرت علیؑ کی سیرت و تعلیمات پر روشنی ڈالتے ہوئےانتہائی عقیدت و محبت سے فضائل و مناقب سیدنا حضرت علی کرم اللہ وجہہ بیان کئے۔

کانفرنس سے خطاب کرتے ہوئے مرکزی صدر منہاج القرآن علما کونسل مفتی غلام اصغر صدیقی نے کہا کہ حضرت علی کرم اللہ وجہہ عظیم سپہ سالار، جرات و شجاعت کے پیکر، علم و حکمت کا بحر بیکراں، خلیفۃ المسلمین تھے، آپ رضی اللہ تعالیٰ عنہ نہایت نرم جو اور خوش گفتار شخصیت کے مالک تھے مگر میدان جنگ میں آپ کے نام اور آمد کے خوف سے دشمنان اسلام پر لرزہ طاری ہو جاتا تھا، سب سے بڑھ کر یہ کہ آپ رضی اللہ تعالیٰ عنہ حضور نبی کریم ﷺ کے جانثار تھے۔ مولا علیؑ کی زندگی تقوی، عبادت، اللہ اور اسکے رسول ﷺ کی محبت کا عملی نمونہ تھی۔ آپ کی شجاعت، علم اور عدل و انصاف جیسے اوصاف ہر مسلمان کے لیے رہنمائی کا ذریعہ ہیں۔ حضور نبی کریم ﷺ نے حضرت علی کو "بابِ علم" قرار دیا۔ آپ کے خطبے، فیصلے اور اقوال حکمت و دانائی کا ایسا خزانہ ہیں جو رہتی دنیا تک انسانیت کی رہنمائی کرتے رہیں گے۔

حضرت علیؑ نے ہمیشہ حق و سچ کا ساتھ دیا اور ظلم کے آگے کبھی سر نہیں جھکایا۔ آپ کے فیصلے عدل کی بنیاد پر ہوتے تھے، چاہے معاملہ کسی بھی عزیز کے خلاف ہو۔ دنیاوی آسائشوں سے بے نیاز ہو کر آپ نے ہمیشہ اللہ کی رضا کو مقدم رکھا۔ امت مسلمہ کے لیے اہلِ بیت کی محبت ایمان کا حصہ ہے۔ حضرت علیؑ کی پوری زندگی صبر و استقامت کا مظہر تھی۔ چاہے مشکلات کا سامنا ہو یا منافقین کی مخالفت، آپ نے ہمیشہ صبر کا دامن تھامے رکھا۔ آپ کی شہادت صبر اور قربانی کی اعلیٰ ترین مثال ہے۔

علامہ ڈاکٹر میر آصف اکبر قادری نے اپنے خطاب میں کہا کہ نبی کریم ﷺ نے فرمایا ہے کہ: "علی سے محبت ایمان کی علامت ہے اور علی سے دشمنی نفاق کی نشانی۔ " یہ حدیث مبارکہ حضرت علی کی عظمت اور ان کے مقام کو واضح کرتی ہے۔ حضرت علیؑ کی مبارک زندگی کا سب سے بڑا درس یہ ہے کہ انسان حق و سچائی پر قائم رہے۔ آپ نے اپنی زندگی سے یہ ثابت کیا کہ اللہ کی رضا کے لیے قربانی دینا اور عدل و انصاف کو تھامے رکھنا ہی اصل کامیابی ہے۔ مولائے کائنات کی زندگی نوجوانوں کے لیے ایک کامل نمونہ ہے۔ ان کی تعلیمات پر عمل پیرا ہو کر ہم اپنی زندگی کو بہتر بنا سکتے ہیں۔

علامہ ڈاکٹر میر آصف اکبر قادری نے امت مسلمہ کو حضرت علیؓ کی تعلیمات سے رہنمائی لینے کی تلقین کی اور کہا کہ ان کے افکار اور عمل کو اپنانے سے معاشرہ امن و سکون کا گہوارہ بن سکتا ہے۔ کانفرنس میں علامہ اشفاق چشتی، مفتی خلیل حنفی، علامہ عثمان سیالوی، علامہ عبد الخالق باروی، علامہ عامر ندیم، علامہ جاوید عارف، علامہ افتخار چشتی سمیت دیگر رہنمائوں نے شرکت کی۔