پہلی قومی ایجوکیشن کانفرنس یکم فروری کو لاہور میں ہو گی

تعلیمی اہداف میں حائل رکاوٹوں کی نشاندہی اور حل کی تجاویز مرتب کی جائیں گی
تعلیم کا بنیادی مقصد مثبت کردار اور فکر کے حامل افراد تیار کرنا ہے: ڈاکٹر حسین قادری
کانفرنس میں ملک بھر سے ماہرین تعلیم شریک ہونگے: چیئرمین منہاج ایجوکیشن سوسائٹی

لاہور (19 جنوری 2025) پہلی نیشنل ایجوکیشن کانفرنس یکم فروری 2025ء کو منہاج ایجوکیشن سوسائٹی کے زیرِاہتمام لاہور میں منعقد ہوگی، کانفرنس میں ملک بھر سے ماہرین تعلیم شریک ہونگے۔

منہاج ایجوکیشن سوسائٹی کے چیئرمین پروفیسر ڈاکٹر حسین محی الدین قادری نے کانفرنس کا اعلان کرتے ہوئے کہا کہ کانفرنس کا بنیادی مقصد تعلیمی نظام اور مطلوبہ نتائج کے درمیان حائل خلیج کی نشاندہی اور حل کے لیے تجاویز مرتب کرنا ہے۔ انہوں نے کہا کہ تعلیم کا بنیادی مقصد مثبت کردار اور فکر کے حامل افراد تیار کرنا ہے لیکن بدقسمتی سے ہمارا نظام تعلیم یہ ضرورت پوری نہیں کر رہا۔ تعلیمی ادارے بھی مطلوبہ معیار کے مطابق کردار ادا نہیں کر پا رہے ۔انہوں نے کہا کہ تعلیم کا مقصدجدت اور تخلیقیت سےبھرپورایک ایسی نسل تیار کرنا ہے جو پاکستان سمیت دنیا بھر میں اُمت مسلمہ کی طرف سے اپنی صلاحیتوں کا لوہا منوا سکے۔

انہوں نے کہا کہ سکولز چل رہے ہیں،اساتذہ تنخواہیں اور مراعات بھی لے رہے ہیں، کتابیں خریدی اور بیچی جا رہی ہیں، ترقیاتی بجٹ رکھے اور استعمال ہو رہے ہیں، سکولز اور کلاس رومزکے اندر نصاب بھی پڑھایا جا رہا ہے لیکن اس ساری کاوشوں کے باوجود نتائج حاصل کیوں نہیں ہو رہے اور ایسا کیوں ہے؟ یہی وہ چند سوالات ہیں جنہیں’’ایم ای ایس ‘‘کے زیراہتمام فرسٹ نیشنل ایجوکیشن کانفرنس میں ایڈریس کیا جائے گا۔

انہوں نے کہا کہ سکولز کے پرنسپلز، اونرز، پبلیشرز اور پبلکیشنز ہاؤسنز کو دعوت دیتے ہیں کہ وہ درد مندی کے ساتھ اس کانفرنس میں شریک ہوں اور تعلیمی مسائل کے حل کے لئے تجاویز دیں۔