منہاج ایجوکیشن سوسائٹی کے زیرِاہتمام نیشنل ایجوکیشن کانفرنس یکم فروری کو ہو گی

ماہرین تعلیمی اہداف کی راہ میں حائل رکاوٹوں کی نشاندہی اور حل پر تجاویز دیں گے
سکول چل رہے ہیں اخراجات ہورہے ہیں مگر نتائج نہیں مل رہے؟ ڈاکٹر حسین قادری

لاہور (26 جنوری 2025) پہلی نیشنل ایجوکیشن کانفرنس یکم فروری 2025ءکو منہاج ایجوکیشن سوسائٹی کے زیرِاہتمام لاہور میں منعقد ہوگی، کانفرنس میں ملک بھر سے ماہرین تعلیم شریک ہونگے۔ منہاج ایجوکیشن سوسائٹی کے چیئرمین پروفیسر ڈاکٹر حسین محی الدین قادری نے کانفرنس کا اعلان کرتے ہوئے کہا کہ کانفرنس کا بنیادی مقصد تعلیمی نظام اور مطلوبہ نتائج کے درمیان حائل خلیج کی نشاندہی اور حل کے لیے تجاویز مرتب کرنا ہے۔ انہوں نے کہا کہ تعلیم کا بنیادی مقصد مثبت کردار اور فکر کے حامل افراد تیار کرنا ہے لیکن بدقسمتی سے ہمارا نظام تعلیم یہ ضرورت پوری نہیں کر رہا۔ تعلیمی ادارے بھی مطلوبہ معیار کے مطابق کردار ادا نہیں کر پا رہے۔

انہوں نے کہا کہ تعلیم کا مقصدجدت اور تخلیقیت سےبھرپورایک ایسی نسل تیار کرنا ہے جو پاکستان سمیت دنیا بھر میں اُمت مسلمہ کی طرف سے اپنی صلاحیتوں کا لوہا منوا سکے۔ انھوں نے کہا کہ سکولز چل رہے ہیں،اساتذہ تنخواہیں اور مراعات بھی لے رہے ہیں، کتابیں خریدی اور بیچی جا رہی ہیں، ترقیاتی بجٹ رکھے اور استعمال ہو رہے ہیں، سکولز اور کلاس رومزکے اندر نصاب بھی پڑھایا جا رہا ہے لیکن اس ساری کاوشوں کے باوجود نتائج حاصل کیوں نہیں ہو رہے اور ایسا کیوں ہے؟ یہی وہ چند سوالات ہیں جنھیں ’’ایم ای ایس ‘‘کے زیر اہتمام فرسٹ نیشنل ایجوکیشن کانفرنس میں ایڈریس کیا جائے گا۔ انھوں نے کہا کہ سکولز کے پرنسپلز، اونرز، پبلیشرز اور پبلکیشنزہاؤسنز کو دعوت دیتے ہیں کہ وہ درد مندی کے ساتھ اس کانفرنس میں شریک ہوں اور تعلیمی مسائل کے حل کے لئے تجاویز دیں۔