منہاج ویلفیئر فائونڈیشن کے زیراہتمام عید فیملی فیسٹیول کا افتتاح
مستحق خاندانوں کےلئے فری شاپنگ ڈاکٹر حسین محی الدین قادری نے افتتاح کیا
فیسٹیول17مارچ تک جاری رہے گا، عید کی فری شاپنگ پر فیملیز کی دعائیں
لاہور(15 مارچ 2025)منہاج ویلفیئر فائونڈیشن لاہور کے زیراہتمام عید فیملی فیسٹیول کا آغاز ہو گیا ہے۔ گزشتہ روز صدر منہاج القرآن انٹرنیشنل پروفیسر ڈاکٹر حسین محی الدین قادری نے افتتاح کیا۔ عید فیملی فیسٹیول میں شاپنگ کےلئے سینکڑوں خاندانوں کو 20ہزار روپے فی خاندان کوپن جاری کئے گئے ہیں۔ عید فیملی فیسٹیول میں کپڑوں، کاسمیٹکس، جیولری، جوتوں کے سٹال لگائے گئے ہیں۔
عیدفیملی فیسٹیول کی افتتاحی تقریب کے موقع پر پروفیسر ڈاکٹر حسین محی الدین قادری نے گفتگو کرتے ہوئے کہاکہ عید فیملی فیسٹیول کے منتظمین اور ڈونرز مبارکباد کے مستحق ہیں جنہوں نے مہنگائی کے اس دور میں غریب خاندانوں کو عید کی خوشیوں میں شریک کیا۔ اللہ اور اس کے رسول ﷺ غربا و مساکین کی مدد کرنے والوں کو پسند کرتے ہیں۔ عید فیملی فیسٹیول 17مارچ تک جاری رہے گا۔ عید فیملی فیسٹیول کے بانی محمد قاسم سرور نے بتایا کہ سینکڑوں مستحق خاندان یہاں فری شاپنگ کریں گے۔
انجینئر محمد ثنا اللہ نے اس موقع پر منہاج ویلفیئر فائونڈیشن کے فلاحی منصوبہ جات کے بارے میں بریفنگ دی۔ عید فیملی فیسٹیول کے پہلے روز بڑی تعداد میں خواتین اور بچوں نے شاپنگ کی اور انتہائی مسرت کا اظہار کرتے ہوئے منہاج ویلفیئر فائونڈیشن کا شکریہ ادا کیا اور اس کارخیر کے اجر عظیم کےلئے دعائیں کیں۔
فری شاپنگ کرنے والی مستحق فیملیز نے شیخ الاسلام ڈاکٹر محمد طاہر القادری کی صحت اور درازی عمر کےلئے بھی دعائیں کیں اور کہاکہ شیخ الاسلام کے لگائے ہوئے منہاج ویلفیئر فائونڈیشن کے اس پودے کی وجہ سے آج ہم اپنے بچوں کےلئے مہنگائی کے اس دور میں باعزت مفت شاپنگ کر رہے ہیں۔
اس موقع پر منہاج ویلفیئر فائونڈیشن لاہور کے کوآرڈینیٹر کیپٹن (ر) عبد المجید نے پروفیسر ڈاکٹر حسین محی الدین قادری اور دیگر قائدین کا افتتاحی تقریب میں شرکت اور حوصلہ افزائی کرنے پر شکریہ ادا کیا۔
اشتیاق حنیف مغل، پروفیسر ڈاکٹر ذوالفقار قادری، معظم مصطفوی، امجد حسین قادری، ممتاز حسین کچھی نے مستحق خاندانوں کو عید فیملی فیسٹیول میں خوش آمدید کہا اور خریداری کے حوالے سے ان کی معاونت کی۔
تبصرہ