شہر اعتکاف کے انتظامات و تیاریاں آخری مراحل میں داخل ہو گئیں
شیخ الاسلام ڈاکٹر محمد طاہرالقادری ’’عشق الہیٰ اور لذت توحید‘‘ کے موضوع پر خطابات کریں گے
معتکفین کی سہولت کیلئے مثالی انتظامات کئے جا رہے ہیں: سیکرٹری شہر اعتکاف جواد حامد
لاہور (18 مارچ 2025) تحریک منہاج القرآن کے زیراہتمام حرمین شریفین کے بعد دنیائے اسلام کے سب سے بڑے شہر اعتکاف کے انتظامات و تیاریاں آخری مراحل میں داخل ہو گئیں ہیں۔ ہزاروں معتکفین توبہ، اصلاح احوال اور آنسوؤں کی بستی شہر اعتکاف میں 10 دن کیلئے گوشہ نشین ہوں گے۔ گلگت بلتستان، آزاد کشمیر سمیت ملک کے چاروں صوبوں اور دنیا کے کئی ممالک سے لوگ معتکف ہوں گے۔
نائب ناظم اعلیٰ تحریک منہاج القرآن وسیکرٹری شہراعتکاف جواد حامد نے بتایا کہ شہر اعتکاف میں معتکفین کی سہولت کیلئے مثالی انتظامات کئے جا رہے ہیں۔ انتظامی کمیٹیوں و منتظمین کے درمیان کوآرڈینیشن کیلئے کنٹرول روم بھی بنا دیا گیا ہے۔ ہزاروں معتکفین کیلئے حفظان صحت کے اصولوں کے مطابق تیار کیا گیا تازہ کھانے کی بر وقت ترسیل کا مربوط نظام ترتیب دے دیا گیا ہے۔ معتکفین کیلئے واٹر فلٹر پلانٹ نصب کر دیا گیا ہے۔ ہیوی ڈیوٹی جنریٹرز کا انتظام بھی کر لیا گیا ہے۔
شیخ الاسلام ڈاکٹر محمد طاہر القادری روزانہ نماز تراویح کے بعد معتکفین سے خطاب کریں گے۔ شیخ الاسلام ڈاکٹر محمد طاہرالقادری کے تربیتی دروس ہزاروں افراد کی زندگیاں بدل دیتے ہیں، امسال ان کے خطابات کا موضوع’’ عشق الہیٰ اور لذت توحید‘‘ ہوگا۔ شہر اعتکاف میں معتکفین کو 24 گھنٹے میڈیکل ایڈ بھی دستیاب ہو گی۔
انہوں نے بتایا کہ چیئرمین سپریم کونسل منہاج القرآن انٹرنیشنل ڈاکٹر حسن محی الدین قادری اور صدر منہاج القرآن پروفیسر ڈاکٹر حسین محی الدین قادری کے تربیتی لیکچرز بھی ہوں گے۔ جامع المنہاج بغداد ٹاؤن لاہور میں مرد و خواتین معتکفین کیلئے الگ الگ انتظامات کئے جا رہے ہیں۔
تبصرہ