منہاج القرآن کے زیراہتمام شہر اعتکاف آباد ہو گیا

رہنمائوں نے ہزاروںمعتکفین کو شہر اعتکاف میں خوش آمدید کہا
شیخ الاسلام ڈاکٹر محمد طاہرالقادری ’’عشق الہی اور لذت توحید‘‘ کے موضوع پر خطابات کررہے ہیں

منہاج القرآن انٹرنیشنل کے زیراہتمام شہر اعتکاف میں پاکستان سمیت دنیا بھر سےہزاروں افراد معتکف ہوگئے۔ مرد جامع المنہاج ٹائون شپ میں اور خواتین منہاج گرلز کالج میں معتکف ہوں گی۔ منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری، صدر منہاج القرآن انٹرنیشنل پروفیسر ڈاکٹر حسین محی الدین قادری، ناظم اعلیٰ خرم نواز گنڈاپور و دیگر رہنمائوں نے معتکفین کو خوش آمدید کہا، شہر اعتکاف میں ہزار وں افراد کی رہائش اور سحر و افطار کے انتظامات کیے گئے ہیں، معتکفین کی خدمت اور دیگر انتظامات کے لیے 6 سو سے زائد کارکنان کی ڈیوٹیاں لگائی گئی ہیں، شیخ الاسلام ڈاکٹر محمد طاہر القادری روزانہ نماز تراویح کے بعد معتکفین سے خطاب کریں گے۔

شیخ الاسلام ڈاکٹر محمد طاہرالقادری ’’عشق الہی اور لذت توحید‘‘ کے موضوع پر خطابات کررہے ہیں۔ ہزاروں خواتین بھی معتکف ہوئی ہیں ان کے لیے منہاج گرلز کالج میں علیحدہ انتظامات کیے گئے ہیں، تحریک منہاج القرآن نے معتکفین کی سہولت کیلئے وسیع پیمانے پر انتظامات کئے ہیں۔ شہر اعتکاف کو مختلف بلاکس میں تقسیم کیا گیا ہے۔ جامع المنہاج ٹائون شپ میں معتکفین کیلئے مسجد کے صحن کے دونوں اطراف دیو ہیکل پنکھے بھی نصب کئے گئے ہیں۔ انتظامی کمیٹیوں کے سربراہان کے درمیان کوآرڈینیشن کیلئے کنٹرول روم بھی قائم کیا گیا ہے۔

شہر اعتکاف کے مکین عید کا چاند نظر آنے تک عبادات میں مشغول رہیں گے۔ شہر اعتکاف میں شرکت کیلئے لاہور، کوئٹہ، کراچی، ملتان، فیصل آباد، مظفر آباد، سکھر، پنجاب، خیبرپختونخواہ، سندھ، بلوچستان، کشمیر، بلتستان سمیت دنیا کے کئی ممالک سے لوگ معتکف ہوئے ہیں۔ معتکفین کے لئے 24 گھنٹے طبی سہولیات دستیاب ہیں۔ پہلے روز ہزاروں معتکفین نے باجماعت نماز تراویح ادا کیں اور ان کے لئے سحر و افطار کا بہترین اہتمام کیا گیا۔