دعوتِ دین کا سب سے مؤثر ذریعہ حسنِ اخلاق ہے: علامہ رانا محمد ادریس

اتباع قرآن مجید اور سیرت نبوی ﷺ کواپنی زندگی کا جزو لازم بنا نا ہو گا: نائب ناظم اعلیٰ منہاج القرآن
تحریک منہاج القرآن کا فکری و تنظیمی سفر عوامی سطح پر نئی جہت میں داخل ہو رہا ہے: پروفیسر ذوالفقار علی

لاہور(13اپریل 2025)تحریک منہاج القرآن لاہور کا اجلاس مرکزی سیکرٹریٹ میں منعقد ہوا۔ نائب ناظم اعلیٰ علامہ رانا محمد ادریس نےاجلاس میں خصوصی شرکت کی۔ اجلاس کی صدارت صدر منہاج القرآن پروفیسر ذوالفقار علی نےکی۔ اجلاس میں ناظم لاہور امجد حسین چوہدری سمیت ضلعی ذمہ داران، پی پی صدور، ناظمین اور کارکنان نے شرکت کی۔

اجلاس سے خطاب کرتے ہوئے علامہ رانا محمد ادریس قادری نے کہا کہ اتباع قرآن مجید اور سیرت نبوی ﷺ کو اپنی زندگی کا جزو لازم بنا لینا ہر مسلمان کےلئے ایک مقدس مشن ہے۔ اس عمل کے ذریعے نہ صرف انسان روحانی ترقی حاصل کرتا ہے بلکہ ایک مثبت معاشرتی کردار ادا کر کے دنیا کو ایک بہتر جگہ بنانے میں بھی اپنا حصہ ڈالتا ہے۔ یہ عمل انسان کو اللہ کے قریب کرتا ہے جس کی بدولت دنیا و آخرت دونوں میں کامیابی ممکن ہوتی ہے۔ انہوں نے کہاکہ دعوتِ دین کا سب سے مؤثر ذریعہ حسنِ اخلاق اور خیر خواہی کا رویہ ہے۔ منہاج القرآن کے کارکنان محبت، خدمت اور اخلاص کے پیغام کو عوام الناس تک پہنچائیں۔ حلقاتِ درود صرف روحانی محفلیں نہیں بلکہ قلبی تطہیر اور فکری ارتقاء کا ذریعہ بھی ہیں۔ ہمیں لاہور کی ہر یونین کونسل میں عرفان القرآن کے دروس کے ذریعے فہم دین کوعام کرنا ہے۔

عوامی رابطہ مہم کو منظم حکمت عملی سے آگے بڑھائیں تاکہ مشن کا پیغام ہر فرد تک پہنچے۔ "صدر لاہور پروفیسر ذوالفقار علی نے اجلاس سے گفتگو کرتے ہوئے کہا کہ تحریک منہاج القرآن کا فکری و تنظیمی سفر عوامی سطح پر اب ایک نئی جہت میں داخل ہو رہا ہے۔ ہمارا ہر کارکن ایک چراغ ہے جس نے اپنے حلقہ اثر میں روشنی پھیلانی ہے۔ ہم لاہور کے ہر علاقے، ہر وارڈ، ہر یوسی تک پہنچنے کے لیے بھرپور منصوبہ بندی کر رہے ہیں۔ ذمہ داران اور کارکنان اپنے کام کو پوری ذمہ داری کے ساتھ فرض سمجھ کر ادا کریں، یہی شیخ الاسلام پروفیسر ڈاکٹر محمد طاہر القادری کا پیغام ہے۔ ناظم لاہور امجد حسین چوہدری نے تمام ذمہ داران کا شکریہ ادا کیا اور اجلاس کی کامیابی کو آئندہ کی بہتر حکمت عملی کی بنیاد قرار دیا۔ اجلاس کے اختتام پر اجلاس میں حلقات درود، دروس عرفان القرآن اور لاہور میں جاری عوامی رابطہ مہم سمیت دیگر امور پر تفصیلی مشاورت کے بعد اہم فیصلے بھی کئے گئے۔