شہرِ اعتکاف 2025: عالمی روحانی اجتماع (لیلۃ القدر) - شیخ الاسلام کا "عاشقوں کی جنت، دیدار الٰہی" کے موضوع پر خطاب

شیخ الاسلام ڈاکٹر محمد طاہر القادری دامت برکاتہم العالیہ کا شہر اعتکاف میں ہزاروں معتکفین سے ساتویں نشست میں "عاشقوں کی جنت --- دیدارِ اِلٰہی" کے موضوع پر فکر انگیز خطاب، انہوں نے کہا کہ آج اللہ تعالیٰ کی رحمتوں کی رات ہے آج کی رات گناہ مٹا دیئے جاتے ہیں، اخلاقِ حسنہ کا فیض ملتا ہے اور رب تعالیٰ سے مانگنے والوں کے مقدر بدل جاتے ہیں۔ اُمت کے زوال کی وجہ قرآن سے دوری ہے۔ جس دن اُمت نے قرآن سے ٹوٹا ہوا ناطہ جوڑ لیا ہر طرح کا زوال کمال میں بدل جائے گا۔

قرآنِ مجید دستورِ حیات ہے اس میں قیامت تک آنے والے انسانوں کے لیے رہنمائی موجود ہے۔ قرآن میں معیشت، معاشرت، سیاست، ایمانیات، عبادات اور حقوقِ انسانی سمیت انسانی زندگی کے ہر شعبہ سے متعلق رہنمائی موجود ہے۔ اللہ تعالیٰ فرماتا ہے : میری یاد میرا ذکر کرنے والوں کے لیے ہے اور میری جنت میرے اطاعت گزاروں کے لیے ہے۔

انہوں نے کہا کہ نوجوانوں اگر آپ چاہتے ہیں کہ آپ ایسے بن جائیں کہ آپ کے دل میں رب تعالیٰ کی محبت سما جائے تو پھر اپنے دلوں کو اُجلا کرلیں اس میں سے ہر غیر کی محبت کو نکال دیں پھر اللہ تعالیٰ آپ کے دل میں سما جائے گا۔ میرے بیٹوں، آج وقت ہے اپنی ترجیحات کو بدلیں اور اس دنیا کی حرص و ہوس کو دل سے نکال کر رب کے بندے بن جائیں، اس کی مخلوق کے خدمت گزار بن جائیں، لوگوں کے لیے رحمت بانٹنے والے بن جائیں، آج کی رات اپنے رب سے گناہ نہ کرنے کے عزم کے ساتھ مغفرت طلب کریں۔

آج کی رات بڑی نایاب اور خیر و سلامتی کی رات ہے، نوجوان غفلت کی نیند سے بیدار ہوجائیں اور دوسروں کی بجائے خود کو بدلنے کا عہد کریں۔ آج وقت ہے اپنے رب کے حضور پیش ہونے کی تیاری کرو، اپنے گناہوں پر ندامت کے آنسو بہاؤ اور رب کو راضی کرو۔ اللہ کو راضی کرنا ہے تو کمزوروں پر ظلم کرنے کی بجائے اُن کی مدد کریں، مظلوموں کو انصاف دیا جائے۔ حقوق اللہ کے معاملے میں اللہ درگزر فرما سکتا ہے مگر حقوق العباد کے معاملے میں کوئی معافی نہیں ہے۔

خواتین اعتکاف گاہ