نام نہاد وزیر قانون کی پریس کانفرنس جعلی حکومت کے مذموم عزائم کی خبر دے رہی ہے۔ ڈاکٹر رحیق عباسی

رانا مشہود نے ڈاکٹر طاہرالقادری سے وہ منسوب کیا جو انہوں نے نہیں کہا
10 اگست یوم شہداء پر پوری قوم ایک پیج پر نظر آئے گی

پاکستان عوامی تحریک کے مرکزی صدر ڈاکٹر رحیق احمد عباسی نے رانا مشہود کی پریس کانفرنس پر رد عمل کا اظہار کرتے ہوئے کہا ہے کہ پنجاب کے نام نہاد وزیر قانون کی پریس کانفرنس جعلی حکومت کے مذموم عزائم کی خبر دے رہی ہے۔ جھوٹ بولنے کے چیمپئن رانا مشہود نے ڈاکٹر طاہرالقادری سے وہ منسوب کیا جو انہوں نے نہیں کہا۔ ساری قوم نے ڈاکٹر طاہرالقادری کو براہ راست سنا جس میں انہوں نے پولیس والوں کے اہل خانہ کی عزت و تکریم بر قرار رکھنے کا حکم دیا۔ شریف برادران کے ٹکڑوں پر پلنے والے مکر و فریب کی چالیں چلنا چھوڑ دیں، جھوٹ بولنے اور قوم کو گمراہ کرنے سے باز رہیں۔ ان خیالات کا اظہار انہوں نے گزشتہ روز عوامی تحریک میڈیا سیل کے انچارج مصطفی خان سے بات کرتے ہوئے کیا۔

انہوں نے کہا کہ ن لیگ کے غبارے سے ہوا نکل چکی ہے۔ انتخابات میں قوم کو سبز باغ دکھا کر ووٹ لینے والوں کا مکروہ چہرہ پوری قوم دیکھ چکی ہے۔ ڈیڑہ سال کا عرصہ ہو جانے کے باوجود غریب عوام کے لئے کوئی ریلیف نہ دینا حکمرانوں کی عوام دشمنی واضح ہو چکی ہے۔ حکمران فقط اپنے اور اپنے خاندان کے مفادات کے تحفظ کے لئے برسراقتدار آتے ہیں۔ غریب عوام ان کے ایجنڈے میں شامل ہی نہیں ہیں۔ انقلاب ہی تمام مسائل کا حل ہے۔ عنقریب ملک لوٹنے اور غریب عوام کے حقوق پر ڈاکہ ڈالنے والوں کا یوم حساب آنے والا ہے۔ 10 اگست یوم شہداء پر پوری قوم ایک پیج پر نظر آئے گی۔ یوم شہداء پر رکاوٹ ڈالنے کی کوشش کی گئی تو نتائج کے ذمہ دار حکمران ہوں گے۔