شہدا کی یاد میں جلسہ 30 اگست کو ہرصورت اسلام آباد ڈی چوک میں ہو گا، خرم نواز گنڈا پور

حکومت پر امن جلسہ خراب کرنے کی کوششوں سے باز رہے، سیکرٹری جنرل PAT
انتظامی کمیٹیاں تشکیل دیدی گئیں، ہم خیال سیاسی جماعتوں سے رابطے شروع

لاہور (28 اگست 2015) سیکرٹری جنرل پاکستان عوامی تحریک خرم نواز گنڈا پور نے کہا ہے کہ 30اگست کو اسلام آباد ڈی چوک میں پر امن جلسہ ہر صورت ہو گا۔ پر امن عوامی احتجاج میں ہزاروں مرد و خواتین شرکت کر کے شہدائے انقلاب مارچ، شہدائے ماڈل ٹاؤن کو خراج تحسین پیش کریں گے۔ پر امن جلسہ کی ضمانت دیتے ہیں اگر کوئی رکاوٹ ڈالنے کی کوشش کی گئی تو نتائج کی ذمہ دار حکومت ہو گی۔ آج یزیدی نظام کے خاتمے اور حسینی نظام کو نافذ کرنے کیلئے ڈٹ جانے کی ضرورت ہے۔ جھکیں گے نہیں بلکہ آگے بڑھ کر شہدا کے خون کا انصاف لیں گے۔ ملک میں ریاست مدینہ کا نظام لائیں گے۔ ڈاکٹر طاہر القادری عوام کے حقوق کی جنگ لڑ رہے ہیں قوم انکے سنگ ریاست بچانے کی جنگ لڑے۔ 30اگست کو پنڈی اسلام آباد کے لوگ گھروں سے نکل کر حکمرانوں کو پیغام دیں گے کہ انکے اقتدار کا سور ج کسی بھی وقت غروب ہو سکتا ہے۔ مصطفوی انقلاب اس دھرتی کا مقدر بنے گا۔ وہ مرکزی سیکرٹریٹ ماڈل ٹاؤن میں 13اگست کے جلسہ کیلئے تشکیل دی گئی انتظامی کمیٹیوں کے سربراہان سے گفتگو کر رہے تھے۔ اس موقع پر بریگیڈئر(ر) مشتاق احمد، جواد حامد، ساجد بھٹی، ابرار رضا ایڈووکیٹ، عثمان بٹ، غلام علی، عمر ریاض عباسی، قاضی شفیق، غلام مصطفی و دیگر موجود تھے۔ خرم نواز گنڈا پور نے کہاکہ شہدائے انقلاب مارچ اور شہدائے ماڈل ٹاؤن کا خون رائیگاں نہیں جائے گا، قاتلوں کو سزا سے کوئی نہیں بچا سکتا۔ دیت نہیں قصاص لیں گے۔ شہدا کے ورثا ہمارے سروں کے تاج ہیں، زخمیوں اور شہیدوں کی قربانیاں کبھی فراموش نہیں کر سکتے۔ عوام قاتل حکمرانوں سے تنگ آ چکے ہیں ان ظالموں نے بھوک، افلاس اور مایوسی کے سوا قوم کو کچھ نہیں دیا۔ مائیں اپنے جگر گوشوں کو نہروں اور دریاؤں میں پھینک رہی ہیں۔ بھوک سے ستائے انسان مُردوں کا گوشت کھانے پر مجبور ہیں جبکہ حکمران ٹولہ اپنا اقتدار بچانے میں مصروف ہے۔ انہوں نے کہاکہ ریاست مدینہ کے 14صوبوں کی طرز پر پاکستان کو 35صوبوں میں تقسیم کر کے عوام کو انکے حقوق انکی دہلیز پر پہنچانا ڈاکٹر طاہر القادری کا خواب ہے۔